Kolkata, Naitung:
U nongïalam ka seng Congress uba dei u Myntri barim jong ka sorkar pdeng, u Adhir Ranjan Chowdhury, u la thoh da ka shithi sha ka Myntri Rangbah ka West Bengal, ka Mamata Banerjee, ha kaba u la dawa ba dei ban tohkit bniah halor ki jingkynnoh ba ki don ki kam bymman bad ki jingleh be-aiñ ha ki jaka ba sah ki briew ba shah sumar ban lait na ki jingkyrni dih ïa ki jingdih pynbuaid kiba don ha kylleng ka jylla.
Ha ka shithi, u Chowdhury u la kynnoh ba ki don ki thanat pulit kiba donkti ha ka liang ka pisa tyngka bad ki katto katne ki jaka ban pynduh ïa ki jingdih buaid bad ba “ka jinglute ka jia ha ka kyrteng jong ka jaka ba la buh na ka bynta ban pynduh ïa ka jingkyrni dih buaid.”
U la thoh, “Ka don ka jingtip ba ki don ki thanat pulit kiba donkti ha ka jingkop pisa bad ki katto katne ki jaka pynduh ïa ka jingkyrni dih buaid bad ka jinglute ka ïaid ha ka kyrteng jong kum kine ki jaka ai jingsumar. Ki briew kiba la shahbuh ha kine ki jaka ki shah pynshitom beiñ bha ha ka bor pyrkhat.”
U Chowdhury u la batai bniah ruh ïa ki jingjia kiba shyrkhei jong ka jingshah lehbeiñ bad jingshah pynshitom beiñ hapoh kine ki jaka.
“Kito kiba shah buh bad sah ha ka Punishment Room ki mad ïa ka jingshah lehbeiñ kaba shyrkhei. La ai jingbam tang khyndiat eh ïa ki, bad saw ngut ki briew ki shah pynbor ban leit sumlang lyngkhuid, kata ruh hapoh ka por kaba 1 minit haduh 2 minit,” u la ong.
Shuh shuh u Chaudhary u la kynnoh shuh shuh ba kine ki briew ki duna ban ïoh ïa ki hok longbriew manbriew bad ki lad jingsumar ba kongsan.
“Kine ki briew kim don jaka ban thiah bha, bad kim ïoh jingbit ban pyndonkam ïa ka paiñkhana ha kano kano ka por ba ki donkam, ha kaba la shah ban rung tang shisien man la ka 3 kynta, bad kata ruh, na ka bynta ka por kaba lyngkot. La phah ïa ki ban dih ïa ka um na ka top kaba sma bad ka bym khuid,” la thoh u Chowdhury.
U la kynnoh ruh ba kine ki jaka ba la pynsah ïa kine ki briew ba kyrni dih jingdih pynbuaid, ki ju dawa pisa na ki bahaïing jong ki.
“Haba uwei u dkhot jong ka longïing u leit jngoh ïa u bahaïing jong u, la shim bai lutksan kaba T.400 na ka bynta ka jingïakynduh. Ha ka jingïakynduh ïa uwei pa uwei uba sah ha kane ka jaka, la dawa pisa palat pud, naduh T.8,000 ha ki katto katne ki khep haduh T.24,000, kaba lah ban pynkiew haduh T.47,000. La shim pisa T.10,000 haduh T.15,000. Kumta, halor ka nongrim, ki phah sei pisa katba lah na uwei pa uwei u briew katba ki lah,” la pule ha ka shithi.
Haba pynpaw ba bun na ki briew kiba shah sumar ha kine ki jaka sumar kim don histori halor ka jingdih drok, u Chowdhury u la ong, “Ki don bun ki briew kiba lui lui ki bym don jingïadei bad ka jingdih drok wat la katta ruh bad ki dang shah pynngat da ka jingkynnoh bymhok bad ki la shah phah sha kine ki ‘ïing’. La ïoh ban kurup ïa shibun ka pisa ba la kamai ha kine ki jaka pynsah ïa kine ki briew ba kyrni ha ki jingdih pynbuaid, ha kaba la ïadonktilang bad ki heh sorkar.”
U la jer kyrteng kyrpang ïa ka Disha Home ha Berhampore, kaba don hajan Panchanantala, kum kawei na ki jaka ba la kynnoh ba ki donkti ha kum kine ki kam.
U Chowdhury, u la pynkut ïa ka shithi jong u, da kaba kyntu ïa ka Myntri Rangbah ka jylla, ba kan sdang ïa ka jingtohkit kaba bniah halor kitei ki jingkynnoh.
