New Delhi, Naitung:
U lehnoh Khalistani uba sah ha US, u Harpreet Singh, ba la tip ruh da ka kyrteng kum u Happy Passia, uba la shah kem ha u bnai Ïaïong bad shah phah sha ka jingtohkit jong ka Immigration and Customs Enforcement (ICE), shen yn sa pynphai noh sha India, la ïathuh ki tyllong khubor, ha ka Lah Sngi U Blei.
U Singh, u dei uba la shah thwet, ha kaba ïadei bad ki kam lehnoh, kiba don ym duna ïa ka 16 tylli ha kylleng ka Punjab bad la kynnoh, ba u la ïatreilang bad ka kynhun lehnoh jong ka Pakistan Inter-Services Intelligence (ISI) bad ka kynhun lehnoh jong ka Khalistani, Babbar Khalsa International (BKI).
U la leh ruh bun tylli ki kam pynbthei bom kti ha ki thanat jong ki pulit ha Punjab bad ha US.Uwei u nongshong shnong jong ka Amritsar, Punjab, u Singh u la shah kem ha US ha ka 18 tarik, Ïaïong ha ki kynhun jong ka Federal Bureau of Investigation (FBI) bad ka ICE.
U Kash Patel, u Director jong ka FBI, u la pynthikna ba “yn sa leh katkum ka hok” hadien ka jingshah kem jong u.”La kem ïa u Harpeet Singh, shi bynta na ka kynhun lehnoh bar ei ba la kynnoh ba u la sah be-aiñ ha America, uba ngi ngeit ba u donkti ha kaba thmu ban thombor bunsien ïa ki thanat pulit ha India bad ha America,” u la thoh ha ka rynsan X ha ka 22 tarik, Ïaïong.
“Ka FBI Sacramento ka la pynlong ïa ka jingtohkit da kaba ïatreilang bad ki para kynhun ba la ïatreilang bad ngi ha ka thaiñ bad kumjuh ruh ha India. Ka kam kaba bha na baroh, bad yn sa pyntreikam katkum ka hok. Ka FBI kan dang bteng ban wad ïa kito kiba leh ïa ki kam thombor – kam pher ha kano kano ka jaka ba ki don,” la bynrap biang u Patel.
Ka kynhun ba pyrshah lehnoh jong ka India, ka National Investigation Agency (NIA), ha u bnai Kyllalyngkot, ka la pynbna ban ai khusnam da ka pisa T.5 lak ïa u Singh. La kwah ban kem ïa u da ka kynhun NIA ha ka mukotduma kaba la mudui ha u bnai Risaw jong u snem ba la lah ha kaba ïadei bad ka jingkawang bom kawang kti ha kawei ka ïing ha Chandigarh.U Singh u la shah ujor palat 30 tylli ki mukotduma ha ki kam runar.
