Shillong, Naitung 08
Ka Meghalaya Basketball Association (MBA), ka la pynbna ban pynlong ïa ka 1st Meghalaya State Sub-Junior Basketball Championship 2025 na ka bynta ki kynhun ïalehkai basketball jong ki khynnah shynrang bad kynthei naduh 16 haduh 19 tarik mynta u bnai ha Don Bosco College, Tura.
Ïa kane ka lympung yn ïatrei lang ryngkat ka Tura District Basketball Association lem bad ka Williamnagar District Basketball Association.
Kat kum ka kyrwoh ba la pyllait da u General Secretary, Bah Wanlambok Ïawphniaw, la ong ba kane ka lympung kan plie lad ïa baroh ki klob, ki shlem ai jinghikai bad ki jaka pule kiba don ha kylleng ka Jylla. Ki nongshim bynta ki dei ban long kiba la kha ha lane shwa ka 1 tarik u Kyllalyngkot jong u snem 2012.
Nangta la kyntu ruh ïa ki kynhun kiba don jingthmu ban shim bynta ba kin pynrung kyrteng ïalade shwa ka 11 tarik mynta u bnai lane ki lah ban phone ha kine number 8731864310 & 6009460470.
