Shimla, Naitung:
Ki nongshong shnong jong ka Thunag kaba don ha Himachal Pradesh, ki la buh ka jingshaniah ha ka Himachal Cooperative Bank, da ka pisa ba ki la kynshew ha ka jingim jong ki, da kaba ngeit ba ka pisa jong ki, ka long kaba shngaiñ, hynrei ka jingshlei um kaba la pynjulor mynta, ka la pynlong ïa katei ka bank, kaba la jot rathai mynta.
Ka mala ba nyngkong jong katei ka bank kaba ar mala ka la shah pynpra, bad ym pat don ka jingshai haduh katno ka jingduh bad jingjulor, kaba la antad ba kan long da ki klur tyngka bad kynthup ruh ïa ki jingdeng ksiar kiba shongdor da ki lak.
Ka Himachal Pradesh ka la don haduh 23 tylli ki jingshlei um, bud sa 19 tylli ki jingjur slap bad 16 tylli ki jingtwa khyndew haduh ka 6 tarik u Naitung.
Kane ka la pynkylla dur ïa ka jylla sha kaba kham sniew, ha kaba ka jingïap jong ki briew ka la kiew sha ka 80 ngut naduh ba sdang ka aïom slap ha ka 20 tarik u Jylliew.
Na kitei ki don 50 ngut kiba ïap na ka daw jong u slap, katba 28 ngut ki dei kiba ïap na ki jingjia aksiden ha surok, ong ka State Disaster Management Authority (SDMA).
“Ka jingkheiñ lang jong ki briew kiba ïap namar ki jingjia ba sngewsih bapher bapher ha Himachal Pradesh ka la poi sha ka 78 ngut haduh ka 6 tarik u Naitung,” la ong ka State Disaster Management Authority.
Ki jingjia ba sngewsih kiba mih na ka jingjur jong u slap ki kynthup ïa 14 ngut kiba ïap na ka jingshlei um, 8 ngut namar ka jingshah rong um, 8 ngut na ka jingshah bat bording bad ka jinghap ba shu jia ryngkhat, bad duna ha ki jingjia twa khyndew, ka jingpom pyrthat bad ka jingshah puh bseiñ.
