Chennai, Lber:
Hapdeng ka jingïakhun kaba sngap jar hapdeng ka DMK bad ka Congress halor ka jingïasam ïa ki shuki na ka bynta ka jingïakhun ilekshon sha ka ïingdorbar thawaiñ, ka DMK ka lah ban ai 28 tylli ki shuki sha ka seng riewlum, la ïathuh ki tyllong khubor. Ka seng synshar ka lah ban khot ïa ka Congress ban ïakren ha kine ki khyndiat sngi ban wan ban pynbeit ïa kane ka jingïateh. “Kan don ka jingkiew kaba rit. Ngi lah ban tyrwa haduh 28 tylli ki seat”, la ong uwei u heh nongïalam jong ka DMK ha ka jingïakren bad ki nongthoh khubor.
Ka DMK ka lah ban pyndep ïa ki jingïateh kular ban ïasam ïa ka shuki bad baroh ki paralok jong ka hapoh shi taïew shwa ban sdang ka jingpynïeng kyrteng na ka bynta ka ilekshon Rajya Sabha, kynthup ïa ki hynriew tylli ki shuki MP na Tamil Nadu.
Watla ka DMK bad ka Congress kim pat poi sha ka jingïasngewthuh jingmut halor ka jingbun ki seat, hynrei baroh ar tylli ki seng kin wad ïa ka jingïasngewthuh jingmut bad pynkut ïa ka jingïakren ïatreilang, la ong ki tyllong khubor jong ka seng.
“Ngi (DMK bad ka Congress) ngin wad ïa ka nongrim kaba ïadei. Kan ym long kaba lah ïa ka DMK ban pynrung ïa ki nongwan thymmai ha ka jingïateh lok lada ngi pynbun ïa ki seat shibun na ka bynta ka seng Congress”, la ong u heh nongïalam jong ka DMK.
