Hyderabad, Lber:
Haba kynnoh ba ka sorkar jylla ka la pynpra da ki hajar tylli ki ïing jong ki briew kiba duk ha kine ki ar snem shiteng, u President ba mynta jong ka BRS u KT Rama Rao ha ki khyndiat sngi jong ka taïew ba la lah, u la kylli ïa ka Congress hato ka Indiramma Rajyam ka mut ban pynpra ïa ki ïing.
U la ïakynduh ïa ki longïing kiba la duh ïa ki ïing kiba la tei ha ki jaka Khammam Bhoodan bad u la pynthikna ïa ki “nongshah pynjulor” ba ka BRS kan pynkynriah ïa ka ïingbishar bahakhlieh duh na ka bynta jong ki. Da kaba kynnoh ba ka sorkar ka la pyrshang ban khanglad ïa u ban leit sha Khammam da ka jingïarap jong ki bor pulit, u la ong.
“Lai ngut ki Myntri ha ka kynhun Myntri ka jylla mynta ki mihkhmat ïa ka Khammam district. Hynrei ym don uwei ruh uba wan shakhmat ban kren halor katei ka phang. Kane ka sorkar ka pyrshang ban lait na kane ka pop da kaba pynkynriah kam ïa u RDO tang shi miet.”
Utei u nongïalam ka BRS u la ong shuh shuh: “Ka seng jong ngi ka ïeng bad phi. Ngin ïakhun haduh ba phin da ïoh ïa ka hok. Lada donkam ngin leit sha ka Supreme Court.”
Katba u Rama Rao u la pynpaw ïa ka jingïasnohkti lang bad kiba la ngat ha ka jingpluh ding ha Khammam bad u la pynthikna ïa ki jingïarap baroh lada ka BRS ka wanphai biang ha ka bor synshar.
Haba kyntait ïa ki jingkynnoh halor ka jingpynpra ïa ka jaka Bhoodan kaba heh 30 akar ha Vinoba Nagar, u District Collector Anudeep Durishetti u la ong ba katei ka jingleh ka long katkum ka aiñ bad ka la ïarap ban ïada ïa ki jaka jong ka sorkar kiba shongdor palat 250 klur tyngka.
Ha ka jingpynlait khubor, u la ong ba 31 akar bad hynñiew gunta ka jaka Bhoodan ha ki survey number 147, 148 bad 149 ki dei kiba don hapoh ka jingshah knieh beaiñ.
Da kaba leh katkum ka jingbthah jong ka CCLA bad ka Telangana High Court, ka bor synshar distrik ka la shim ïa ka jaka, da kaba ïada ïa ki jingdon jingem ba kordor jong ki paidbah. U nonglum khajna u la ong ba ka mukotduma ba la mudui ha ka ïingbishar jong ka Telangana ha ka 24 tarik u Rymphang, kaba tuklar ïa ki jingpynpra ïing, ka la shah weng noh.
Ka jingtohkit kaba bniah da ka Bhoodan Board bad ka tnad Revenue ka la lap ïa ki kot ki sla thok bad ki jingai pisa beaiñ, u la ong da kaba bynrap ba la ujor mukotduma pyrshah ïa ki katto katne ngut ki briew bad ka jingtohkit katkum ka aiñ ka dang ïaid shakhmat.
U la ïathuh shuh shuh ba ka bor synshar ka la shim ïa ka jaka kaba dang sah, lait noh tang ki jingtei kiba la shah ktah ha ka hukum jong ka iingbishar ba ha khlieh duh.
Ïa ka jaka yn pyndonkam na ka bynta ki jingdonkam paidbah ha ki por ban wan.
Ka sorkar kan shim ruh ïa ki sienjam ban pynthikna ïa ka hok na ka bynta ki longïing kiba duk kiba dei hok kiba la duh ïa ki ïing ki sem jong ki ha katei ka jingpynbna, la pule ha ka kyrwoh.
