New Delhi, Naitung:
Kumba la buh jingkheiñ la ong ba ki la don haduh 70,000 ngut ki riewngeit kiba la ïashim bynta ha ka Amarnath Yatra haduh ka lah sngi U Blei katba kawei pat ka kynhun jong ki 8,605 ngut ki la mih sha Kashmir Valley ha kane kajuh ka sngi, ong uwei u heh sorkar.
Katkum ka jingïathuh jong ki heh sorkar, la jan 70 hajar ngut ki briew ki la leh ïa ka Shri Amarnath ji Yata kaba dang ïaid shakhmat haduh mynta naduh ba la sdang ïa ka jingïaid riewblei naduh ka 3 tarik, Naitung.
Na kine ki 21,512 ngut ki Yatri ki la leh ïa ka ‘Darshan’ hapoh ka krem bakyntang ha ka sngi U Blei.
Ki heh sorkar ki ïathuh ba sa kawei pat ka kynhun jong ki nongleit ïaid riewblei kiba don 8,605 ngut ki la mih na Bhagwati Nagar Yatri Niwas ha Jammu ban leit sha them Kashmir ha kaba ar tylli ki kynhun ki la synran ïa ki ha ka lah sngi U Blei.
“Ka kynhun ba la synran nyngkong ka kit ïa ki 3,486 ngut ki nongleit ïaid riewblei sha ka jaka sah ha North Kashmir Baltal katba ka kynhun ba ar ba la synran ïa ki 5,119 ngut ki nongleit ïaid riewblei sha ka jaka sah ha South Kashmir Nunwan (Pahalgam),” ong ki heh sorkar.
Ki heh jong ka Shri Amarnathji Shrine Board (SASB) kaba pynïaid ïa ki kam jong kane ka jingleit ïaid riewblei ba man la u snem ki la ïathuh ba nalor ka jingbun ki riewngeit kiba wan sha ki Yatri Niwas jong ka Bhagwati Nagar ha Jammu, bun ki nongïaid riewblei kiba wan pyntip beit sha Baltal bad ha Nunwan (Pahalgam) na ka bynta ban pynrung kyrteng Yatri ha ka jaka.
Ki la don arngut ki nongïaid riewblei ki la ïap na ka daw jong ka jinglong ka mariang naduh ba la sdang ka Yatra mynta u snem.
Ki bor ba dei khmih kim shym la iehnoh ïa u mawsiang ban ai ïa ka jingïada kaba bun rukom ïa ka Amarnath Yatra mynta u snem, namar kane ka jia hadien ka jingshah thombor kaba shyrkhei ha ka 22 tarik, Ïaïong ha kaba ki lehnoh ba la kyrshan da ka Pakistan ki la pynïap ïa ki 26 ngut ki riew paidbah hadien ba ki la pynïakhlad ïa ki halor ka nongrim jong ka jingngeit ha ka khlaw Baisaran ha Pahalgam.
Ha kaba ïadei bad ka jingdon jong ka Yatra ki bor ba dei khmih ki la wanrah sa 180 tylli ki kynhun jong ki CAPF ban pynkhlaiñ ïa ka bor ba la don lypa jong ki shipai, ki BSF, ki CRPF, ki SSB bad ki pulit ka thaiñ.
Ki nongshong shnong ki la ai ka jingïatreilang kaba pura sha ka Amarnath Yatra mynta u snem kumba ki ju leh ha ki por ba la dep. Ban phah ïa ka dak kaba khlaiñ bor ba ki nong Kashmir ki la sngew kyndit jur ïa ka jingshah thombor jong ki lehnoh ha Pahalgam, ki nongshong shnong ki la long kiba nyngkong eh ban pdiang sngewbha ïa ka kynhun ba nyngkong jong ki nongleit ïaid riewblei ryngkat ki jingdeng bad ki Placard katba ki nongïaid riewblei ki dang ïaid lyngba ïa ka Navyug Tunnel ban rung sha ka them Kashmir ha Qazigund.
Ha ka angi U Blei, ki nongshong shnong ki la ai ïa ki jingdih ba pjah bad ka um dih kaba khuid sha ki nongleit ïaid riewblei kiba wanphai na ka jaka sah ha Baltal kaba don ha North Kashmir Ganderbal distrik.
Ban siew kylliang ïa katei ka jingleh ba donburom, ki nongleit ïaid riewblei, khlem artatien, ki la pdiang ïa ka jingshakri jong ki nongshong shnong bad ki la pynpaw ïa ka jingsngewnguh namar ka jingïeid ba la pyni da ki nong Kashmir.
