Ranchi, Naitung:
Kum ka jingjop kaba khraw, ha ka por ba la pynlong ïa ka jingkhynra pyrshah ïa ki lehnoh Maoist, ka kynhun ba ïatreilang jong ki bor pahara kaba kynthup ïa ki pulit ka Chaibasa, ki pulit ka Seraikela-Kharsawan, ki pulit ka Jharkhand Jaguar bad ka kynhun shipai 60th Battalion jong ka CRPF ki la ïoh kurup 16 tylli ki bom IED na ki khlaw ba rben jong ka Langi hapoh ka jaka sah jong ki pulit jong ka Toklo. Katkum ka jingïathuh jong ki pulit, la ong ba baroh ki bom ki la shah pynduhbor ha ka jaka ba ki shipai pahara ki la lap.
Ïa ka jingleit khynra la pynlong hadien ba la ïoh jingtip na ki kynhun wadbniah kiba la phah jingtip halor kane sha u Superintendent of Police, ka West Singhbhum, ha ka 6 tarik, Naitung, ha kaba la shem ïa ka jingdon jong ki nongïalam ba hakhliehduh jong ki Maoist, u Misir Besra, u Anmol, u Mochu, u Anal bad katto katne ngut kiwei pat, kiba ryngkat bad ki dkhot ka kynhun lehnoh ki la ïaid bad shang ha ka thaiñ Saranda-Kolhan halor ka jingthmu jong ki ban leh ïa ki kam pyntriem.
Kum ka jingpyntreikam kaba sted hadien ba la ïoh jingtip halor kane, la thaw ïa ka kynhun ba ïatreilang bad la phah mareh sha kane ka thaiñ ha ka sngi kaba bud, kata ha ka lah sngi U Blei ha ki jaka ba long khlaw kaba hap hapoh ka jingkhmih jong ka thanat Toklo ha West Singhbhum bad ka Dalbhanga Out Post ha Seraikela-Kharsawan.
“Ha ka jingkhynra ki bor pahara ha ki thaiñ lum Kotsona bad Langi, la ïoh ban kurup 16 tylli ki bom IED, ha kaba uwei – uwei u khia kumba 2 kg, ïa kiba la buh da ki lehnoh Maoist ban thmu thombor ïa ki bor pahara bad ban khanglad ïa ki jingkhynra kiba dang ïaid shakhmat,” la ong ki heh pulit.
