Kohima, Naitung:
Ki pulit ki la kem ïa u nongïalam jong ka seng Maharashtra Navnirman Sena (MNS) na ka thaiñ Thane distrik, u Avinash Jadhav, ha ka step jong ka Sngi Ba-ar, shwa ka jingïalang kaba la thmu ban pynlong ha Thane ban pyrshah ïa ka jingïakhih ba la pynlong da ki nongkhaïi pyrshah ïa ka jingshah shoh jong uwei u trai dukan die marbam namar ba um kren ha ka ktien Marathi, ong ki heh pulit.
Kane ka jingïaid paidbah, kaba la tyrwa da ka Maharashtra Ekikaran Samiti ha ka thaiñ Mira Bhayander jong ka Thane distrik jong ka Maharashtra kham hadien ha ka Sngi Ba-ar, ym shym la ai jingbit satia da ki pulit, ki la ong.
Ki pulit ha ka Lah Sngi U Blei, ki la pynmih ïa ki hukum ban khang pyrshah ïa ka jingrung jong ka seng MNS ha Thane bad u khlieh jong ka Palghar, u Jadhav, uba dei ban ïashim bynta ha ka jingïalang, ha ka thaiñ Mira Bhayander.
La kem ïa u na ïing jong u ha Thane ha ka por kumba 3.30 baje mynstep, ong u heh jong ka Thane Police Control Room.
Ka MNS ba la ïalam da u Raj Thackeray ka la pynmih ruh ïa ka durkhih halor ka jingshah kem jong u ha ki Social media. La pynkhlaiñ ïa ka jingpahara ha ka thaiñ Mira Bhayander halor ka jingthmu ban pynlong ïa ka jingïalang paidbah, kaba la khang pyrshah da ki pulit, ong ki heh sorkar.
Uwei u trai dukan die marbam ha ka thaiñ Bhayander u la shah thap ha ki katto-katne ngut ki dkhot jong ka MNS ha ka taïew ba la lah namar ba um shym la kren da ka ktien Marathi.
Hadien la kem ïa ki hynñiew ngut ki dkhot jong ka MNS bad la shah ïa ki ban leit hadien ba ki pulit ki la ai jingpynbna ïa ki.
Ki nongkhaïi ha ka thaiñ Bhayander ki la pynlong ïa ka jingïakhih, da kaba dawa ban leh eiei pyrshah ïa kito kiba thombor ïa u trai dukan die marbam.
