Khliehriat, Naitung 09
Ka Umrasiang United SC, Rymbai Pohskur bad Moonongtdu SC ki la ïoh jingjop ha ka lympung ïalehkai 3rd Division League Stage ba la pynïaid da ka East Jaiñtia Hills District Football Association (EJHDFA) ha ka Sngi Balang ha madan Artificial Turf Diengshynrum, Khliehriat.
Ha ka jingïalehkai kaba nyngkong, ka Umrasiang United SC ka la jop da 2-1 kol pyrshah ïa ka Youth SC Pyrtakuna. Ïa ki kol jong ka Umrasiang United la thep da u Unsaaibiang Dkhar ha ka minit kaba 7, kumjuh u Jen Muksor (71), katba ïa ka kol jong ka Youth SC Pyrtakuna la thep da u Darimi o Syrti ha ka minit ba 56.
Ha ka jingïalehkai kaba bud, ka Rymbai Pohskur SC ka la pynliem da 3-0 kol ïa ka Umtyra SC. Ïa kine kol la thep da u Lamphrang Dkhar ha ka minit kaba 18, kumjuh u Emon Nongtdu (43) bad u Encourage Dkhar (67).
Ha kawei pat ka jingïalehkai ka Moonongtdu SC ka la pynliem ïa ka Iongkaluh SCSC da 1-0 kol lyngba ka kol ba la thep da u Edame Rasmut ha ka minit kaba 80+2.
