Washington, Naitung:
U President jong ka America, Donald Trump, u la pdiang sngewbha ia u Benjamin Netanyahu, ha ka jingiabam ja miet ha White House ha ka Sngi Nyngkong, katba u dang pynbor ia utei u Myntri Rangbahduh ka Israel ba un pynkut noh ia ka thma ha Gaza, kaba la pynjulor lut ia ki jingdon-jingem hapoh katei ka nongbah bad kaba la pynjynjar ruh ia baroh ki paidbah nongshong shnong ba lui-lui jong ka. Ka jingleit kaba lai jong u Netanyahu naduh ba u Trump u la wanphai biang ha ka bor synshar ka long ha kum kane ka por ba kongsan bha, ha kaba une u President jong ka US u la lah ban wanrah ia ka jingïasuk kaba dang shen hapdeng ka Israel bad ka Iran.
Haba shong ha ka liang pyrshah jong ka miej kaba jrong na u nongïalam Israel, u Trump u la pynpaw ruh ïa ka jingshaniah ba ka Hamas ka kloi ban pynkut noh ïa ka jingïakynad ha Gaza kaba la neh mynta la 22 bnai kynthih.
U Trump u la ong ruh ba ka Hamas ka kwah ban ïakynduh bad ka kwah ban don ïa ka jingsangeh thma kaba shyrta.
Kane ka jingïakynduh hapdeng utei u nong-ialam ka US bad ka Israel ha Washington, ka la long ruh ha kane ka por ba ka Israel bad ka Hamas ki la pynlong ïa ka jingïakren khlem da thmu ha ka sien kaba ar ha Qatar halor ka jingsangeh thma hapoh Gaza.
Katba u Netanyahu u la ong ba u la jied ia u Trump naka bynta ban ioh ia ka khusnam ‘Nobel Peace Prize’, kaba long ka thong ba u President jong ka US u la buh slem bha, ha kaba u Netanyahu u la aiti ruh ha u Trump ia ka shithi kaba u la phah sha ka komiti ai khusnam.
