Gandhinagar, Naitung:
U Myntri Rangbahduh Narendra Modi, hynnin ka sngi u la pynpaw ka jingsngewsih halor ka jingduh noh jong ki mynsiem briew na ka jingkhyllem ka jingkieng ha Gujarat ha Vadodara distrik. Ki la don kumba 9 ngut ki briew kiba la ïap bad 6 ngut ki la mynsaw hadien ba ki kali ki la hap ha ka wah Mahisagar hadien ka jingkhyllem ka jingkieng Gambhira ha ka distrik.
“Ka jingduh jong ki mynsiem briew namar ka jingkhyllem ka jingkieng ha Vadodara district, Gujarat, ka long kaba sngewsih haduh katta katta. Ka jingsngewlem sha kito kiba la duh noh ïa la ki baïeid ba thoiñ jong ki. Ai ba kiba mynsaw kin ïoh noh kloi ïa ka jingkoit,” ong ka ophis treikam jong u Myntri Rangbahduh ha ka jingthoh kaba u la buh ha ka rynsan X.
Ka ophis treikam jong u Myntri Rangbahduh ka la pynbna ruh ïa ka jingïarap pisa kaba T. 2 lak na ka Prime Minister’s National Relief Fund (PMNRF) sha kiba haïing hasem jong kine kiba la khlad ha kane ka jingjia ba sngewsih.
U Myntri Rangbah ka Gujarat, u Bhupendra Patel, u la pynpaw ruh ïa ka jingsngewkhia halor ka jingduh ki mynsiem briew ha ka jingkhyllem jong ka jingkieng Gambhira bad u la bthah ban tohkit mardor ha kaba ïadei bad ka jingjia.
