Hyderabad, Naitung:
Ki la don saw ngut ki nong Africa kiba la shah kem halor ka jingshah kynnoh ba ki la sah palat por kumba la buh ha ka Visa jong ki bad ki la khaïi drok, bad la beh noh shi syndon ïa ki.
Ïa kine ki briew la ithuh ïa arngut ki nong Nigeria, kawei na Tanzania, bad uwei na Sudan, ha kaba nyngkong ki la wan rung sha India da ki jait Visa bapher bapher, kynthup ïa ki Visa jngohkai pyrthei, ki Visa na ka bynta ban phah sumar, bad ki Visa na ka bynta ki samla pule. Hynrei ki la sahkut noh ha India hadien ba la kut ka por jong ki Visa bad ki Passport jong ki.
Kaba nyngkong eh napdeng jong ki, ba la ithuh da ki pulit ka Hyderabad, ka dei ka nong Tanzania, u Mwajuma Almasi Masisila, uba la wan sha India da ka Tourist Visa hynriew snem mynshwa.
“Ka jingbatai jong ka, kumno ka la im, kaei kaba ka la leh na ka bynta ban im, kumno ka lah ban siew ïa ka ïing kaba siew T.25000 shibnai, bad ka rukom im jong ka, kam shym la ïahap satia,” la ong u Deputy Commissioner jong ka Hyderabad Task Force, YVS Sudheendra, ha ka jingïakren bad ki nongthoh khubor.
Na ka jingtohkit ïa ka, la lap ba ka don jingïadei bad kiwei pat kiba shah kynnoh, ka Chinaza Nnanna Vivian, u Maxwell Anthony Izuchukwu bad u Ahmed Hamid.
U Izuchukwu uba 29 snem ka rta u la wan na Nigeria da ka Medical Visa, u Hamid uba 27 snem ka rta u la wan da ka visa pule bad ka Vivian kaba 38 snem ka rta ka la wan da ka Passport Sierra Leone hynrei ka dei ka nongshong shnong jong ka Nigeria.
Hadien ba la pynlong ïa ka jingtohkit, la ïoh jingtip ba ki dei ki nongkhaïi drok, hynrei ym shym la ïoh ban kurup drok na ki ha ka por ba la pynlong ïa ka jingkhynra. Ki bor ba dei khmih, ki la khang pyrshah ïa ki ba kin wanrung biang sha India hadien ba la beh ïa ki.
