Amaravati, Naitung:
Ka jylla Andhra Pradesh ka dang shim ïa ki lad ki lynti kiba kongsan ban long ka jylla kaba lait na u drok, ha kaba ki sienjam kiba pyrkhing ki dang ïaid shakhmat ban ïakhun pyrshah ïa ka jingdih bad ka jingkhaïi drok, ong u AK Ravi Krishna, Inspector General of Police bad u khlieh jong ka Elite Anti-Narcotics Group for Law Enforcement (Eagle) Wing jong ka Jylla.
Kane ka jingkren jong u ka long ha ka jingïalang pynsngewthuh ïa ki samla halor ka jingïada na u drok ba la pynlong ha ka Bharatiya Vidya Bhavan’s Sri Bommidala Srikrishnamurthy Auditorium ha ka Sngi U Blei.
U Ravi u la pynpaw ïa ka jingsngewkhia kaba khraw halor ka jingbun jong ki samla pule ha ki jaka pule kiba kham heh kiba ngop ha ki jingdih pynbuaid kum u Ganja, u drok Cocaine, bad u drok Heroin.
“Ka don ka jingïadei kaba beit beit hapdeng ka jingdih drok bad ka jingkiew ki kam runar. Ïa ka Eagle Wing la thaw da ka sorkar jylla kyrpang ban ïakhun pyrshah ïa ka jingrep bad jingshalan be-aiñ ïa ki drok,” u la ong.
U la ban jur ïa ka jingdonkam jong ki jingpynsngewthuh paidbah ha ki kolej.
U Treasurer jong ka Red Cross ka jylla u Ramachandra Raju u la ïaroh ïa ka jingpyrshang jong ka Eagle bad pynbna ba yn pynlong ïa ki jingpynsngewthuh paidbah ha ka jingïatreilang bad ki kynhun jong ki samla Red Cross ha ki kolej.
U Director ka Master Minds u M Mohan u la kyntu ïa ki kmie ki kpa ban buddien ïa ka jinglong jong ki khun bad u la khot ban buh ïa ki jaka ai jingmut bad jingïasyllok ban kyrshan halor ka jinglait na ka jingkyrni dih ïa ki jingdih pynbuaid.
