Aizawl, Naitung:
Kumba la sakhi, la ong ba ki la don palat 6,000 ngut ki phetwir na Myanmar kiba la phet sha Mizoram hadien ka jingïakynad biang kaba la mih hapdeng ki kynhun kiba kyrshan ïa ka synshar paidbah jong ka Chin, ha kaba ki seng bhalang mynta ki la rung na ka bynta ban wanrah ka jingïasuk, la ïathuh ki bor pynïaid distrik ha ka jylla.
Kine ki lanot ki la poi sha ka shnong Zokhawthar bad Vaphai lyngba ka jingkieng ha khappud bad da kaba jam lyngba ka wah Tiau kaba pynïakhlad ïa ki ar tylli ki ri kiba don ha katei ka thaiñ. Kiba bun na kine ki poiwir ki la sah ha ki ïing jong ki bahaïing jong ki, katba kiba bun kiwei pat ki la ïoh jaka rieh ha ki skul bad ki Community Hall.
Ki Chin, ki Mizo, ki Kuki, ki Zomi, ki Hmar, bad ki Kuki-Chin (Bangladesh) ki dei ki para jaitbynriew, kiba dei na ka kynhun jaidbynriew Zo. Kiba bun ki Chin bad ki Mizo kiba sah ha ki jaka ba marjan pud bad ka Myanmar ki don la kijong-kijong ki bahaïing.
Kine ki poiwir ki la sdang ban poi ha Mizoram naduh ka sngi Palei jong ka taïew ba la lah hadien ba ki la ïohi ïa ka jingleit jingwan jong ki riewkieng atiar bad ba ki la ïakynduh jingeh biang. Naba ki jinglong jingman ha Myanmar ka dang kynrum kynram, ka sorkar Mizoram kam shym la bthah ïa ki ban leit phai biang.
Uwei u heh sorkar ka Mizoram, u bym kwah ban pynpaw kyrteng, u la ïathuh ha kawei na ki lad phah khubor ba ïa ki lanot kiba sah ha ka Community Hall bad ha ki skul la khmih da ki trai shnong bad ki katto katne ki seng treimon sngewbha.
Ka jingïasiat hapdeng ki dkhot ka Chin National Defence Force (CNDF) bad ki dkhkot ka Chinland Defense Force-Hualngoram (CDF-H) ka la jia ha ka sngi Saitjaiñ, halor ka jingthmu ban ïoh synshar donbor. Ka CNDF ka la lah ban knieh noh ïa baroh 8 tylli ki ktem jong ka CDF-H ha kane ka thaiñ.
Katkum ki khubor ba la ïohlum, la ïathuh ba katto katne ngut ki dkhot ka CDF-H, kiba la mynsaw ha katei ka jingïasiat, la pynkynriah noh sha Mizoram, na ka bynta ban ïoh jingsumar.
