Hyderabad, Naitung:
U Myntri khynnah jong ka tnat Home Affairs u Bandi Sanjay Kumar u la sam 20 hajar tylli ki bicycle sha ki khynnah klas 10 ha Ambedkar Stadium ha Karimnagar ha ka Sngi Balang.
Kum ka jingthmu jong ka “Modi Gift” ka jingai sngewbha u Modi sha ki khynnah pule, u Bandi Sanjay u la ong ba ki kompeni ki la noh synñiang sha kane ka jingsam jingai sngewbha lyngba ka CSR Fund. “Ka jingmut jong kane ka jingsam bicycle ka la wan na ka District Collector ka Pamela Satpathy. Ka la ai jingmut ba hapoh ka jingthmu jong ka jingpyntreikam ïa ka ‘Beti Bachao, Beti Padhao’ ka jingai bicycle sha ki khynnah kynthei kan long kaba myntoi”, u la ong.
U Bandi Sanjay u la pynbna ruh ba ha kine ki sngi ban wan yn sa sam ïa ki “Modi Kits” kiba don ïa ki tiar pule na ka bynta ki khynnah skul naduh Class 1 haduh 6. U la kdew ba ka jingpyrshang jong ka sorkar pdeng ban pynbha ïa ka tnad pule puthi, da kaba kynnoh ba ka sorkar NDA ba la ïalam da ka BJP ka la pynlut palat T. 8 lak klur ha ka pule puthi ha kine ki 11 snem ba la leit.
U Bandi Sanjay u la pynpaw ba tang mynta u snem, la mang T.1,28,650 klur, kaba la jan long ar shah haba ia nujor bad ka por jong ka jingsynshar ka sorkar UPA.
