Agartala, Naitung:
Ka jinghap jong u slap uba jur ka la ktah shibun ïa ka South Tripura distrik, kaba la pynlong ïa palat 800 ngut ki nongshong shnong ban shah pynkynriah noh sha ki jaka sah ba shipor.
Wat la u slap u la duna haduh ka janmiet jong ka Sngi Balang, hynrei ka jingshlei um bad ka jingtuid jong ka um ka dang bteng ha ki jaka them.
Kum shi bynta ban ai jingshngaiñ ïa ki nongshong shnong, ki bor pynïaid distrik, ki la ong ba kiei kiei baroh ki hap hapoh ka khmih bniah bad ka jingtehlakam.
“Ki la don kumba 16 tylli ki jaka sah ba shipor, kiba la ai jaka sah ïa ki 840 ngut ki briew na ki 250 tylli ki longïing. Da ka jingduna jong u slap bad ka jinghiar ka um, ngi khmih lynti ba kan nang weng noh ïa ki jingeh,” ong u Majistor District ka South Tripura u Md Sajjad P.
Haduh ba la thoh ïa ka khubor ym pat don kano-kano ka jingpynjot kaba jur ïa ki jingdon jingem jong ka sorkar ne jong ki riewshimet.
Ki bor sorkar ki la trei shitom ban ïaleh katba lah ban ai ka jingshakri kaba bha ïa ki nongshong shnong khnang ban lait na kino kino ki jingjia kiba sngewsih bad pynbiang ïa ki jingdonkam jong ki.
U Myntri Rangbah ka jylla u Manik Saha u peit hi dalade ïa kane ka jinglong jingman.
Kawei ka kynhun NDRF ka la pynpoi ha ka distrik, ryngkat bad hynñiew tylli ki kynhun SDRF.
Ki heh jong ka tnad Water Resources Department ki dang buddien ïa ka jingkiew jong ki wah ha kylleng ka distrik.
