Shillong, Naitung 10
Ka ‘thei ïalehkai ka Jylla, ka Fragrancy Riwan ka la shah jied ban don hapoh ka thup jong 24 ngut ki ‘thei ïalehkai Under-20 jong ka ri India na ka bynta ar tylli ki jingïalehkai phutbol paralok ka ban long ha Tashkent pyrshah ïa ka kynhun ïalehkai Under-20 ka Uzbekistan ha ka 13 bad 16 tarik mynta u bnai.
Ka jingthmu jong kane ka long shi bynta ban pynkhreh ïa ka AFC U20 Women’s Asian Cup 2026 Qualifiers, kaba la thmu ban sdang naduh 6 haduh 10 tarik u Nailar ha Myanmar.
Ka Fragrancy kaba dei na ka thaiñ Lawbah kaba don sharum Mawsynram, ka dei kaba la don bynta ha ki katto-katne ki lympung ïalehkai hapoh ka Jylla ha kaba ka la ïoh ruh ban mihkhmat ïa ka Jylla ha u snem 2019. Hadien ba ka la pynïasoh ïalade ban shah pyntbit ha ka kam ïalehkai jong ka shlem ai jinghikai Bhaichung Bhutia Football Academy. Ka la mihkhmat ruh ïa ka Delhi ha ka Senior Women’s National Football Championship 2024 bad ka la ïoh thep 5 kol.
Hadien ba u coach uba na Sweden u Joakim Alexandersson u la dep ban pynbna ïa ki 24 ngut ‘thei ïalehkai, kane ka kynhun ka la mih na Bengaluru ha ka Sngi Palei hadien ba ka la dep ban kilanmet bad kan poi ha Tashkent ha ka step Sngi Thohdieng.
Ka India kan pynkhreh ban ïakhun pyrshah ïa ka Indonesia ha ka 6 tarik u Nailar, kumjuh ïa ka Turkmenistan ha ka 8 tarik bad ïa ka Myanmar ha ka 10 tarik ha Yangon ha ka AFC U20 Women’s Asian Cup Qualifiers. Ki kynhun nongjop na ki jingïalehkai group bad wan ba-ar na ki phra tylli ki group kin ïoh rung sha ka wat khatduh ka ban long ha Thailand ha u snem ban wan.
Nalor ka Fragrancy, la kynthup lang hapoh kane ka kynhun jong 24 ngut ïa ka nongapkol ka Monalisha Devi Moirangthem, kaba la don bynta hapoh ka kynhun ïalehkai (senior) kaba la ïoh rung sha ka AFC Women’s Asian Cup 2026 kaba long ha Thailand mynshem taïew. Ka la mih madan shisien ha ka jingïalehkai (qualifiers) bad ka la rung sha ka prokram kilanmet jong ka kynhun ïalehkai U-20 ha ka 7 tarik mynta u bnai hadien ba ka la wanphai na Thailand.
Ka Melody Chanu Keisham, Shubhangi Singh, Viksit Bara, Sulanjana Raul bad ka Cindy Remruatpuii Colney ki la kilanmet lang bad ka kynhun ïalehkai rangbah ha Bengaluru.
Ki 24 ngut ‘thei ïalehkai U-20 ka ri India kiba la leit sha Uzbekistan na ka bynta ki jingïalehkai paralok ki long:
Goalkeeper: Melody Chanu Keisham, Monalisha Devi Moirang-them & Ribansi Jamu.
Defender: Alina Chingakham, Cindy Remruatpuii Colney, Fragrancy Riwan, Juhi Singh, Nishima Kumari, Remi Thokchom, Sahena TH, Shubhangi Singh & Viksit Bara.
Midfielder: Anju Chanu Kayen paibam, Arina Devi Nameirakpam, Bhumika Devi Khumukcham, Khushbu Kashiram Saroj, Monisha Singha & Neha, Pooja.
Forward: Babita Kumari, Deepika Pal, Lhingdeikim, Sibani Devi Nongmeikapam & Sulanjana Raul.
