Shillong, Naitung 11
Ka nongïalehkai tennis ka India, ka Radhika Yadav, 25 snem ka rta, ka la shah siat ïap ha la u kpa, u Deepak Yadav, ha ka ïing sah jong ki hi ha Gurugram, ha ka nohphai Sngi Palei. Ka Radhika ka la don bynta ha ka ITF kaba ïalehkai ‘single’ bad ‘double’ shwa ba kan long coach.
Ki Pulit jong ka Gurugram, ki ïathuh ba ki la ïoh jingtip na kawei ka hospital shimet ha katei ka nongbah ba kawei ka samla ka la ïap na ka daw jong ka jingmynsaw namar ka jingshah siat kuli bad ynda ki la poi ha katei ka hospital, ki la lap tang ïa u kñi jong ka Radhika, u Kuldeep Yadav, ym ïa ki kmie ki kpa jong ka.
Kat kum ka ejahar ba la mudui – halor ka jingkynnoh pynïap briew – ha Gurugram Sector 56 police station hadien ka jingujor jong u Kuldeep, u Deepak u la sngewsih ïa ka khun jong u namar ba ka la bteng ban leit sha jaka hikai ïalehkai tennis ha ka nongbah wat hapdeng ka jingpyrshah jong u bunsien.
Katkum ka website jong ka ITF, ka Radhika ka la ïalehkai 36 tylli ki jingïalehkai marwei bad 7 tylli ki jingïakhun marwei hapoh ka jingpeit jong ka ITF ha ka jingim jong ka. Ka la ïalehkai ha ka jingïalehkai ‘singles’ ha u bnai Lber 2024, bad ‘doubles’ ha u bnai Jymmang 2023. Wat la ka la dap shisnem tam naduh ka jingïalehkai ba khatduh jong ka ha ka jingïakop hapdeng ki ri ka pyrthei, hynrei la pynshisha ba ka la long ka coach ha ka shlem hikai jong ka ha Gurugram, kaba ha kaba kut ka la long ka phang jong ka jingbym ïahap jingmut hapdeng jong ka bad u kpa.
Ka khubor NDTV ka la batai ba u Deepak uba la kam ïa ka kam runar jong u ha ki pulit. U la ong ba u la siat ïa ka lai sien nadien, namar ba ka la kyntait ban khang ïa ka shlem hikai jong ka haba la bthah ïa ka ban leh kumta.
