Itanagar, Naitung:
Kum shi bynta jong ka jingwanrah jingjop kaba khraw ha ka jingïakhun pyrshah ïa u drok, ki pulit ka Banderdewa kiba hap hapoh ka Itanagar Capital Region (ICR) ha ka sngi Palei ki la khanglad ïa ka jingpyrshang ban kit be-aiñ ïa ki song ba la suba ba ki dei ki mar ba be-aiñ jong ka NDPS, ha kaba ki la ïoh ban kurup haduh 27.72 gram u drok, ha ka por ba ki pynlong ïa ka jingkhynra kaba stet hajan ka Niya Colony.
Khlem da pynslem ïa ka jingpyntreikam hadien ba la ïoh jingtip ha kaba ïadei bad ka jingwan ki drok na Nagaon ha Assam, ka kynhun pulit ba la ïalam da u SI Koj Tada, ryngkat bad u ASI S.K. u Jha, Head Constable T. Bomdom, bad u Constable R. Tsering, ki la pynlong ïa ka jingkhynra kaba jop ryngkat ka jingpeit bniah baroh kawei jong u SDPO u Naharlagun Rishi Longdo bad u Ophisar-in-Charge jong ka Banderdewa Police Station, u Inspector Kipa Hamak.
Ha kane ka jingpyntreikam ki pulit ki la kurup ar tylli ki song sabon bad saw tylli ki song ba la suba ba dei u drok. Hadien kane ka jingïoh kurup, la mudui da ka mukotduma ha Banderdewa Police Station katkum ka Case No. 50/2025, U/S 21(b) jong ka aiñ NDPS ba la pule ryngkat bad ka Section 3(5) jong ka Bharatiya Nyaya Sanhita (BNS), 2023. Ha kane ka jingjia, arngut ki briew ki la shahkem,
U heh pulit ka ICR, u Dr. Nyelam Nega, APPS, u la ïaroh ïa ka jingtreikam kaba stet bad kaba ïatreilang jong ka kynhun bad u la pynpaw biang ïa ka jingshimkhia ba khlem artatien jong ka tnad ban ïakhun pyrshah ïa ka jingma jong u drok ha kane ka thaiñ.
