Shillong, Naitung 13
Ka jingïalehkai group jong ka U-20 Fourth Division 2025 ba la pynïaid da ka Shillong Sports Association ka la poi sha kaba kut ha ka sngi Saitjaiñ, ha kaba ka Mawñianglah ka la long sa kawei pat ka kynhun kaba la jam sha ka pre-quarter final hadien ba ka la lah ban pynliem noh ïa ka New Challenger da 2-1 ha ka Group-E.
Ha kawei pat ka jingïakhun jong kajuh ka group hapdeng ka Krang bad ka Ïateilang of Lamlyer ki la ïasam mar shi point hadien ba ki la ïakhaid mar 1-1 kol.
Haba phai sha kane ka jingïakhun, ka New Challenger ka la ïoh ban pynkhih jar nyngkong eh lyngba u Wilbert Kharlukhi (28), hynrei u Bantyngshaiñ Nongsteng (40’+2) u la lah ban pynïakhaid kylla na ka bynta ka Mawñianglah ha ka kylla step. Ka Mawñianglah ka la pynbud biang sa shi kol ha ka kylla miet lyngba u Stevenson Nongneng (46).
Lyngba katei ka jingjop, ka Mawnianglah (9 point) ka la wan ha ka kyrdan ba-ar kata hadien ka Laitumkhrah (12 point) kaba ïoh ban lamkhmat ha kane ka group, katba ka Ïateilang bad ka New Challenger ki la wan ha ka kyrdan balai bad basaw.
Wat la kawei pat ka jingïakhun ka la long tang ka jingpyndep rukom namar kin ym lah ban jam sha kawei pat ka wat jingïakhun, pynban ka Krang ka la khur ïa ka shi point kaba nyngkong eh. Hadien ka jingbym lah ban thep kol ha ka kylla step, u Nightstar Kharkrang (52) u la pynkhih jar nyngkong eh na ka bynta ka Krang hashwa ba u Wankitbok Kharumnuid (62) un pynïakhaid kylla na ka bynta ka Iateilang.
Ha ka jingïakhun pre-quarter final ki don 12 tylli ki kynhun ha kaba la phiah ïa ki ha ki saw tylli ki pool kiba don mar lai tylli ki kynhun. Ha ka Pool 1 ki long ka Golflink, Laitlulong & Laitumkhrah. Pool 2 ka Them Rangshken, Lapalang & Mawlynrei. Ha ka Pool 3 ki long ka Mawkasiang, Lummawbah & Mawnianglah. Katba ha ka Pool 4 ki long ka Mawphlang, Laitkroh & Lumpyngngad. Ki kynhun kiba kynsai kin ïoh rung sha ka quarter final.
Kane ka jingïakhun pre-quarter final kan sdang ha ka Lah Sngi U Blei kan long hapdeng ka Golflink pyrshah ïa ka Laitlulong ha ka por 1 baje mynsngi, katba ka Them Rangshken ïa ka Lapalang ha ka por 4 baje nohphai sngi.
