Guwahati, Naitung:
Kum shi bynta ban pynpaw ka jingpyrshah jur halor ka jingthoh jong ka kynhun lehnoh ULFA-I hadien ba ka la shah shah thombor ha ki shipai ka tnat Indian Army, kaba la shim ïa ka jingim jong u heh nongïalam jong ka kynhun bad pynmynsaw ïa ki 19 ngut kiwei pat ki dkhot jong ka kynhun ha ka jingshah hiar thma na suiñ ha ki shipai ha ki bynta jong ka khappud India bad Myanmar, ki bor pahara, ki shipai India ka tnat Indian Army bad ki kynhun bahakhliehduh jong ka sorkar ki la sngap jar jar bad ki la pynrem jur halor ka jingthoh jong ka kynhun lehnoh.
U Myntri Rangbah ka Assam u Himanta Biswa Sarma u la kyntait ïa ki jingkynnoh jong ka ULFA-I bad u la pyntikna ba ki Pulit ka Assam kim shym la don bynta ei ei ha kane ka jingkhynra bad ka jinghiar thma, lymne leh kino kino ka kam ba mih na ka khyndew ka shyiap jong ka Assam.
Ha ka jingïapher, ka ULFA-I ka la kam ha ka jingpynbna pathai khubor ba ki bor pahara jong ka India ki la pynlong ïa ka jinghiar thma kaba la suba ba ka dei na suiñ ha khappud India-Myanmar, ha kaba la ïathuh ba la pynïap ïa uwei na ki heh nongïalam jong ka kynhun bad pynmynsaw ym duna ïa ka 19 ngut kiwei pat ki dkhot.
Ka kynhun pyntriem ka la pynthikna ïa ka jingkhlad noh jong u Lieutenant General u Nayan Asom, ïa uba la ithuh kum u President ba donburom jong ka dorbar ba hapoh jong ka ULFA(I).
“Ki shipai ba don ha kane ka jaka, ki la tam shaba palat ïa ka bha ka miat jong ka longbriew-manbriew da kaba siat da u Missile ha ka por ba la leit tep ïa u Lt. J. Nayan Asom, President ba donburom jong ka Lower Council jong ka United Liberation Front of Assam (Independent). Ki shipai Veronia ki la pnïap ïa u Brigadier Ganesh Asom bad u Colonel Pradeep Asom, bad pynmynsaw ïa ki katto katne ngut kiwei pat ki heh shipai bad kumjuh ïa ki riew paidbah ha kane ka jingshah thombor kaba shyrkhei bad kaba khlem don ka jingpyrkhat briew. Ki shipai jong kane ka ri, ki la ïai bteng ban pynlong ïa ka jingleit khynra na suiñ ha kiba bun ki thaiñ. Nga kwah ban pyntip sha ki nongshong shnong jong ka Assam ba ngi la kut jingmut ban kput halor kane ka jingshah thombor kaba shyrkhei jong ka ri synshar ki phareng,” ong ka jingpynbna kaba ar ba la pyllait.
Katkum ki tyllong khubor, la ong ba lai tylli ki kynhun ba kyrpang jong ki shipai ka Special Forces jong ka tnat Indian Army ki la pynlong ïa ka jingkhmih bniah lyngba ki Drone ha ki jaka jong ka ULFA kiba don ha Myanmar.
“Ka jingthmu pyntreikam ka la ïaid mynta la shibnai shiteng. Ki kynhun wad bniah ba hakhliehduh ki la buh lai tylli ki UAV halor ki ktem jong ka ULFA ha kine ki saw sngi ba la dep ban lum ïa ki dur bad ki durkhih jong ki lehnoh”, la ong ki tyllong khubor jong ki kynhun wad bniah.
“Ki shipai India ki la hiar thma da ki Drone ha kajuh ka por ha ki saw tylli ki jaka sah jong ki lehnoh ULFA. Ki la pynduh jait ïa ki katto katne ki nongïalam ba hakhliehduh jong ka ULFA bad ki la pynjot syndon ïa ki tiar ba ju ïakren Radio, ka jaka buh tiar siat, bad ki jaka buh marbam ha ka por ba ki la leh ïa kane ka kam,” la bynrap shuh shuh ki tyllong khubor.
Hadien ki Operation Bajrang bad Rhino pyrshah ïa ka ULFA, ki shipai India ki kheiñ ïa kane kum kawei na ki jinghiar thma kaba heh tam jong ki pyrshah ïa ka kynhun ba la shah ñiew beaiñ.
