Shillong, Naitung 14
U Cole Palmer u la thep ar kol na ka bynta ban pynlong ïa ka Chelsea ban pynshaïong ngaiñ ïa ka lahduh jong ka Cham-pions League, ka Paris Saint-Germain da 3-0 kol ha ka phainal jong ka Club World Cup kaba la long ha ka Lah Sngi U Blei ha MetLife Stadium na ka bynta ban rah ha ka sien kaba nyngkong ïa ka FIFA Club World Cup.
Ka PSG ka dei ka kynhun kaba la paw bha ha kaba la wan ban sakhi lang da u Donald Trump hadien ba ka la wan ïalehkai sha America naduh ba ka la jop ïa ka UEFA Cham-pions League bad ka la lah ruh ban pynliem ïa ka Real Madrid da 4-0 kol ha ka semi-final. Hynrei namar ba ka la shah thep haduh lai kol ha ka kylla step, ka PSG ka la hap ban mad ïa ka jingshah rem da 3-0 kol ha ka Chelsea.
U Palmer u la pynkhih jar nyngkong ha ka minit kaba 22 bad kawei pat tang hapoh shiteng kynta ha shwa ba u Joao Pedro un thep ha ka minit kaba 43.
Kane ka long ka sngi kaba pyndiaw mynsiem ïa ka PSG lem bad ki nongkyrshan jong ka, namar u Joao Neves u la shah sei da ka red card shwa ban wai hadien ka jingpeit bniah lyngba ka VAR namar ba u la kum tan ïa u Marc Cucurella.
Kane ka jinglah ban thep kol ka long kaba khlem poi pyrkhat namar ba ka Chelsea ka la lah ban pynsah kynmaw. Ka la long kawei napdeng 32 tylli ki kynhun kiba ïakhun ha ka Club World Cup ha kaba ka la jop ïa ka UEFA Conference League bad wan ha ka kyrdan kaba saw ha ka Premier League.
Wat la katta ruh, ka jingjop ha Europe ka la ju long ka jingthmu ba kongsan ha kane ka samoi na ka bynta ka kynhun jong u Luis Enrique, kaba mynta ka don thik shibnai ban pynhiar ïa kane bad ban shim shuti shwa ban wanphai biang sha ka jingïakhun ha ka UEFA Super Cup pyrshah ïa ka Tottenham Hotspur.
Ka la don ka jing-sngewtynnad kaba shi-sha ha ka MetLife Sta-dium ha kaba u President Trump u la wan ryngkat bad ka Melania Trump ha kaba la sakhi da 81,118 ngut ki paidbah.
Ha kane ka jingïaleh-kai la ïohi ruh ïa ka jingïakynad hapdeng ka kynhun ki nongïalehkai ka Chelsea bad ka PSG. La sakhi ruh ba u coach ka PSG, u Luis Enrique u la don bynta lang ban tuklar ha katei ka jingjia bad i kumba u la ktah kti ïa u rangïalehkai ka Chelsea, u Joao Pedro. Hadien katei ka jingïalehkai, u Enrique u la kam da kaba ong ba kum kane ka jingjia kam dei ban wan jia bad dei ruh ban kiar.
