Raipur, Naitung:
Kawei ka samla kaba hapoh 20 snem ka rta bad ar ngut kiwei pat ki la mynsaw hadien ba la jia ka jingbthei bom ba la pynap da ki lehnoh Naxal ha District Bijapur jong ka Chhattisgarh, ong ka khubor ba la wan na ki pulit, ha ka Lah Sngi U Blei.
Kane ka jingjia ka la jia ha ka janmiet jong ka Sngi U Blei ha ka por ba kine ki lai ngut kiba dei ki nongshong shnong jong ka shnong Dhangol kaba hap hapoh u pud u sam jong ka Madded Police Station, ki la leit sha kawei ka khlaw kaba don marjan ban leit kheit tit, la ïathuh uwei u heh pulit.
Kine ki briew ha ka por ba ki la poi ha katei ka khlaw, ki ila kum tur sha ka jaka ba la tep ïa une u bom IED, ha kaba u la bthei kynsan kynsan bad pynmynsaw ïa ki kjat bad ki durkhmat jong ki, la ong u heh pulit. Ïa kine ki lai ngut ki briew la tip kyrteng kum u Chidem Kanhaiya (24), Korse Santosh (26) bad Kavita Kudiam (16), khlem da pynslem hadien ba la jia ka jingjia, ïa kine baroh lai ngut la pynkit sha Bijapur District hospital, u la ong.
Ki lehnoh Naxal ki ju buh ïa u bom IED ha ki lynti ïaid kjat, halor ka jingthmu ban pynap ïa ki shipai pahara, kiba ju pyndonkam ïa kum kine ki lynti ha ka por ba ki leit khynra ïa ki lehnoh Naxal hapoh ki khlaw. Ki riew paidbah ki ju ngat ha kum kine ki jingriam ba la pynap da ki lehnoh ha kip or ba la leit ha ka thaiñ Bastar, kaba kynthup ïa ka distrik Bijapur.
