Shillong, Naitung 14
Ka Shillong Sports Association (SSA) ka la sdang ïa ka lympung ïalehkai SRGT 3rd Division Football League 2025 ha ka Lah Sngi U Blei ha kaba ka Sanmer SC bad ka Lawmali SC ki la ïasam mar shi point hadien ba ïakhaid mar 1-1 kol.
Ha kane ka jingïakhun kaba la long ha SSA Stadium kaba ha First Ground Polo, baroh ar kynhun ki la pyrshang ban ïakhun tyngeh naba sdang. Hynrei ha ka minit kaba 11 ka Sanmer ka la ïoh ban pynkhih jar nyngkong eh lyngba u Kamkynti Pahsyntiew. Hadien shiteng kynta ka Lawmali ka la lah ban pynïakhaid kylla lyngba u Derick Syiemlieh ha ka minit kaba 34.
Ka lympung kan bteng biang ha ka Sngi Ba-ar ha kaba ka Madanryting SC kan ïakhun pyrshah ïa ka Pomlakrai SC ha ka por 10:30 mynstep.
Ha kane ka lympung ki la don 18 tylli kynhun ba la phiah sha saw tylli ki group. Ha ka Group-A ki long ka Sanmer, Lawmali Pyllun, Madanrting, Pomlakrai & Nongumlong. Kumjuh ha ka Group-B ki kynthup ïa ka Lumparing, Rynjah, Umlyngka, Imson & Umrynjah. Ha ka Group-C ki long ka Kharang, Iaitylli, Gorkha Association & Madan SCC. Ha ka Group-D ki kynthup ïa ka Mawkriah West, Laitlyngkot, Lamlynti Madanlyngkhi & Umïew Maw U Sam.
Kat kum ka prokram ïalehkai ba la pyllait da ka SSA, la ong ba ki ar tylli kynhun ki ban wan ha ki kyrdan ba shakhmat na baroh saw tylli ki group kin ïoh rung sha ka quarter-final bad ar tylli pat ki klob kiba lah ban pynthikna ban rung sha ka final kin ïoh ban kiew kyrdan sha ka Second Division ha ka aïom ban wan. Katba saw tylli ki kynhun kiba wan ha ki kyrdan shatrai ha baroh saw tylli ki group kin shah pynhiar kyrdan sha ka U-20 Fourth Division.
Kumba ka paw ka Madanrting, Umrynjah, Madan SCC bad ka Umïew Maw U Sam ki dei kynhun kiba la kiew kyrdan na ka Fourth Division mynshem snem, katba ka Imson bad ka Laitlyngkot ki dei kiba la shah pynhiar kyrdan na ka Second Division ha ka aïom ba la dep.
