Shillong, Naitung 15
Hadien ka jingïakhaid mar 1-1 kol bad ka Uzbekistan ha ka jingïalehkai paralok, ka kynhun ki ‘thei ïalehkai ka India kan pynkhreh biang ïa ka jingïakhun ba ar bad kaba khatduh pyrshah ïa katei ka kynhun ha ka Sngi Balang ha Do’stlik Stadium ha ka por 8:30 mynmiet.
Kumba long ka jingïalehkai kaba nyngkong, kane ka jingïalehkai ruh kan long hapoh ka stadium kaba thylli katkum ka jingïateh soskular hapdeng kine ki kynhun kiba dang pynkhreh na ka bynta ka AFC U-20 Women’s Asian Cup Qualifiers ka ban long ha u bnai ban wan.
Ka kol ba la thep da u Sulanjana Raul ha ka minit kaba 79 ka la pynlong ïa ka India ban ïakhaid hadien ba ka Uzbekistan ka la lamkhmat ban thep kol nyngkong lyngba ka Mexribon Egamberdiyeva (38).
Haba pyrkhat halor ka jingjop, u coach ka India u Joakim Alexandersson u la ong ba ka kynhun jong u ka la dei hok ban ïoh ïa ka jingjop, hynrei ka jingsdang kaba suki ka la khanglad ïa ki lad ki kabu.
“Ka la long ka jingïalehkai kaba bha na ka bynta ka kynhun jong ngi. Ngi la ïakhun tyngeh hapdeng ki 15-20 minit ba nyngkong. Ngim shym la long kiba ïakhun dohïap. Hynrei katba nang ïaid ka por, ngi la nangkiew bad ruh ngi la sdang ban thaw ïa ki lad hadien ki jingpynkhreh bad ki jingïalehkai kiba bha.”
“Ha ka jingshisha ngi la lah ban ïalehkai bha ha ka kylla miet, wat la ngi la ailad ar tylli ki lad namar ki jingbakla jong ki shimet. Hynrei ngi la thaw bun ki lad ban ïa ki, bad kaba thikna, ngi dei hok ban jop. Hynrei phi hap ban thep kol da kine ki lad lada ngi kwah ban khur jingjop,” la ong utei u coach na Sweden.
Ha ka jingshisha kane ka jingïalehkai ka dei ban long ha ka Sngi U Blei, hynrei la pynkynriah noh da palat 24 kynta namar ka jingeh ha ka jingtreikam ha Do’stlik Stadium. Wat hapdeng ka jingkylla kaba pher ha ka minit kaba khatduh ha ka por ïalehkai, ka India ka dang ïai bteng ha ka jingmut jingpyrkhat bad ki ‘thei ïalehkai kim shym la ailad ban mad ïa ka jingshah rem.
“Ka jingsngew ka la long kaba tmang khyndiat hadien ba ngi la poi ha ka jaka ïalehkai ha ka Sngi U Blei bad tip ba ngin ym lah ban ïalehkai. Hynrei ngi dei ka kynhun kaba ïajan bha kaba la ïadon lang la katto- katne bnai, kumta ki khynnah kynthei ki long kiba biang ha ka discipline. Ngi sah ha ka ïingbasa kaba biang ha ka bam ka dih bad kiwei ki jingdonkam bad ki jingdonkam kiba bha,” ong u Alexander.
Ka jingpynkylla ïa ka por ka mut ba ki kynhun kin kham duna shisngi ban shongthait bad ban ïoh biang ïa ka met shwa ka jingïalehkai kaba ar, hynrei kata kam da long kaba eh ïa u Alexandersson. Mynta u kyrmen ban ïohi ïa ka jinglong kaba kham biang ha ka jingïalehkai bad ruh ban pynurlong ïa ka jingjop.
Haba bishar ïa ka jingïakhun hadien ka jingïalehkai kaba nyngkong, u Alexandersson u la sngew ba kine ki ar tylli ki jingïalehkai paralok ki pynlong ïa ka jingpynkhreh na ka bynta ka AFC U20 Women’s Asian Cup Qualifiers, ha kaba ka India kan ïakhun pyrshah ïa ki kynhun kum ka Myanmar, Indonesia bad Turkmenistan ha Yangon.
