Chennai, Naitung:
Ki paidbah kiba bun jong ka jylla Tamil Nadu, hadien ka jingtreikam jong kiba bun ki skhim sorkar, ki la pynpaw ka jingsngewnguh ïa ka sorkar bad ki la ong ba ka skhim jong ka jingbam step ka long kaba ki da sngewhun shisha khamtam ïa kito kiba donkam ïa ka.
Ka jingkyrpad ban pynjlan ïa ka Chief Minister’s Breakfast Scheme haduh ka klas 8, ka jingkhang ïa ki Social Media na ka bynta ki khynnah skul, bad ban pynthikna ban ai ïa ki bus pass khlem jingsiew ha ka por kaba biang sha ki khynnah skul ki long katto katne ki jingdawa ba kongsan ba la pynpaw da ki MLA ha ka jingïakren halor ka jingdawa mang tyngka na ka bynta ki tnad skul bad ki tnad pule ba kham shalor ha ka Ïingdorbar ha ka sngi Palei.
U MLA ka CPM u M Chinnadurai u la ong ba ïa kane ka skhim bam jingbam step la pdiang sngewbha da ki briew bad u la kyrpad ïa ka sorkar kmie ban pynjlan haduh ka klas 8 ha ki skul sorkar bad ki skul ai jingïarap. Nalor ba u la kyntu ban pynthikna ban ai ïa ka bus pass khlem jingsiew ha ka sngi nyngkong jong man la ka snem pule, u la kyrpad ruh ia ka sorkar ban pynkiew ïa ka jingjngai kaba dei hok ban ïoh ïa ka bus pass sha ka 40 kilomitar.
U MLA ka Congress u ST Ramachandran u la kren halor ka jingdonkam ban ïada ïa ki khynnah na ka jingktah kaba sniew jong ki Social Media. Haba pynpaw ba ki ri kum ka Australia ki la buh kyndon tyngeh ïa ka jingpyndonkam ïa kum kine ki Platform da ki khynnah kiba hapoh 16 snem ka rta, u la ong ba ka jylla ka dei ban pyrkhat ban khang ïa ki Platform, khamtam ïa ka Instagram bad Snapchat, na ka bynta kane ka rta.
U Myntri barim ka tnad pule puthi uba dei ruh u MLA ka AIADMK u KP Anbalagan u la kynnoh ba ka jingdon jong ki samla pule kiba leit pule sha ki jaka pule ba kham heh ka dang hiar.
Hynrei u Myntri u Govi Chezhiaan u la kdew ïa ki lad ki lynti bapher bapher kiba la shim ban kyntiew ïa ka jingpynrung kyrteng ha kaba baroh kin ïoh jingmyntoi.
