New Delhi, Naitung:
Na ka jingwad bniah la shem ba ka kam thombor jong ki lehnoh ha ka 22 tarik, Ïaïong ha Pahalgam kaba don ha J&K, kaba la shim ïa ka jingim jong 26 ngut ki paidbah, ka dei ka jingthmu ba la lah ban pynurlong na ka jingïasuhbuit sniew jong ka kynhun syntiat jong ka Pakistan bad ka kynhun lehnoh jong ka Lashkar-e-Taiba (LeT) katkum ki jingbthah jong ki kynhun saiñ pyrthei bad ki shipai katei ka ri bad pynpaw lyngba ki kam pyntriem jong ki lehnoh Pakistan, la ïathuh ka tyllong khubor.
Kumba la batai, la ong ba kane ka dei ka kam ba la ïatreilang hapdeng ki lehnoh LeT bad ka kynhun syntiat ISI kaba ïadei bad ka jingshah thombor ha ka 26/11 ha Mumbai, ka Inter-Services Intelligence (ISI) ka la ai jingbthah ba kyrpang ïa u heh nongïalam jong ka kynhun Lashkar uba don ha Pakistan, u Sajid Jutt ban pyntreikam tang ïa ki lehnoh bar ri na ka bynta ki kam pynïap briew ba shyrkhei ha ki them Baisah.
Ban pynthikna ïa ka jinglong rieh kaba pura, ym shym la shim ïa ki lehnoh kiba na Kashmir ban ïalam shabar ri, bad ha ka jaka kata, la bthah ïa ki lehnoh bar ri jong ka LeT kiba treikam ha J&K na ka bynta katto katne por ban pyndep ïa ki jingpynïap briew katba dang pynthikna ïa ka jingïadonkti kaba rit eh jong ki nongshong shnong kaba ïa ka tynrai “donkam ban tip”.
Mynta ki don kumba 68 ngut ki lehnoh nabar ri bad lai ngut ki lehnoh trai ri kiba treikam ha kane ka them. La don tang kawei ka jingpynrung kam lehnoh na ka thaiñ la ïathuh haduh mynta u snem.
