Patna, Naitung:
U Myntri Rangbah ka Bihar, u Nitish Kumar, ha ka Sngi Palei, u la pynbna paidbah ban ai bording ei na ka bynta baroh ki nongpyndonkam ha ka jylla haduh 125 Unit.
Kane ka jingpynbna, ka wan ha ka por ba ka Bihar, kan pynlong ïa ka ilekshon Assembly kham hadien jong une u snem, ha kaba ka lah ban long ha u bnai Risaw ne Naiwieng, wat la ka Election Commission kam pat lah ban pynmih ïa ki tarik kiba biang.
“Ngi la ai bording ha ka dor kaba kham duna naduh sdang. Mynta ngi la rai ba naduh ka 1 tarik u Nailar 2025, kata naduh ka bill jong u bnai Naitung, baroh ki nongpyndonkam hapoh ka jylla kin ym donkam ban siew pisa ei ei na ka bynta ka bording haduh 125 unit”, la phah jingthoh u Myntri Rangbah ha ka rynsan X.
Katkum ka jingong jong u Myntri Rangbah, kane ka jingpynbna kan ai jingmyntoi ïa baroh 1 klur 67 lak tylli ki longïing ha ka jylla.
U la pyntip ruh halor ka rai jong ka sorkar jylla ban buh ïa ki Solar Panel ha tnum ïing lane ha ki jaka paidbah ba marjan da ka jingmynjur lang jong ki nongpyndonkam bording hapoh ka ri. U Kumar u la ong ba ïa kane ka rai yn sa pyntreikam ha ki lai snem ban wan.
Hapoh ka jingtreikam jong ka skhim Kutir Jyoti, ka sorkar jylla kan kit lut ïa ka jinglut baroh ban buh ïa ki kor pynmih bor ding na ka sngi na ka bynta ki longïing kiba duk palat bad kan ai ka jingkyrshan kaba biang na ka bynta kiwei pat.
