Patna, Naitung:
Ka jingpyntreikam jong ka Special Intensive Revision (SIR) kaba dang ïaid shakhmat ha ka jingkhmih bniah ïa ki thup jong ki nongthep vote jong ka Bihar, ka la pynmih ïa ka jingïakynad ha ka saiñ hima-sima, ha kaba ka Election Commmission (EC) ka la pynpaw ba kumba 35.5 lak tylli ki kyrteng kin shah weng noh na ka thup jong ki nongthep vote jong ka jylla.
Ka kynhun EC ka ong ba ka jingpynkylla ka dei shi bynta jong ka jingpyrshang ba man ka por ban pynthymmai bad pynkhuid ïa ki jingpynryng kyrteng, kaba pynpaw ïa ki jingkylla ba shisha kum ka jingwan buhai shnong, ka jingïap, bad ki jingpynrung kyrteng ba arsien.
Haduh mynta, ki la don kumba 6.6 klur ngut ki nongthep vote, kumba 88.18% na ki nongthep vote jong ka Bihar-ki la aiti ïa ki phom jingkheiñ ba la pynthymmai jong ki.
Ka tarik ba khatduh ban phah ïa ki kot ki sla kan long ha ka 25 tarik, Naitung, hadien kane yn sa pynmih ïa ka Draft Electoral Roll.
Ki la don palat 35 Lak tylli ki kyrteng ban pynduh na ka thup jong ki nongthep vote ha Bihar ha kane ka jingpynthymmai ïa ka jingpyntreikam.
Katkum ki jingbuh jingkheiñ bathymmai ba la ïasam da ki heh jong ka EC, la ong ba ki la don kumba 12.5 lak ngut ki nongthep vote (1.59%) la lap ba ki la ïap hynrei ki dang don ha ka thup kyrteng kum ki nongthep vote.
Nalor kane, ki la don 17.5 lak tylli ki kyrteng (2.2%) ki dei jong ki briew kiba la mih syndon na Bihar, 5.5 lak tylli ki kyrteng (0.73%) ki pyni ïa ki jingpynrung kyrteng ba arsien ha kaba ki nongthep vote ki la pynrung kyrteng palat ïa ka shisien.
Kine ki jingbym ïahap ki pynbun ïa ka thup jong ki nongthep vote sha ka 35.5 lak ngut, kaba long palat 4.5% na ka jingbun ki nongthep vote jong ka jylla-ka jingpynkhuid kaba khlem pat ju leh mynno mynno ruh hashwa ka ilekshon ba kongsan jong ka Ïingdorbar Thawaiñ jong ka Bihar ha u snem 2025.
Ka EC ka la pynpaw ruh ba la ithuh ïa ki bar jylla na Nepal, Bangladesh, bad Myanmar ha ka jingleit pynshisha ha ki jaka rep. Kine ki briew, kiba la pynrung kyrteng bakla kum ki nongthep vote, yn weng noh hadien ba la don ka jingkhmih kaba kham bniah.
Haba ïada ïa kane ka sienjam, ki heh jong ka EC ki la pynpaw ba ka SIR ka thmu ban kyntiew ïa ka jinglong hok jong ka elekshon da kaba pynthikna ba ki thup kyrteng ki long kiba mynta bad kiba thikna. Hynrei katei ka jingpyntreikam ka la shah kynthoh ha ki nongïalam ka liang pyrshah.
U Tejashwi Yadav jong ka RJD u la pynpaw ïa ka jingsngewkhia, da kaba kdew ba ka jingpynduh wat tang 1% ki nongthep vote ha kawei ka konstitwensi ka ïaryngkat bad kumba 3,200 tylli ki kyrteng ha kawei kawei ka bynta jong ka dorbar thawaiñ. Da ka jingshah weng mynta kaba la antad ba kan palat ïa ka 5%, ki jingsngewkhia jong ka kynhun ba pyrshah ki nang jur halor ka jingktah kaba lah ban mih na ka jingdon jong ka ilekshon.
Kane ka kam ka la poi sha ka Supreme Court, ha kaba mynta ki dang bishar ïa ki dorkhas kiba tuklar ïa ka rukom treikam jong ka SIR. Ha ka dorbar kaba kham mynshwa, ka ïingbishar ka la ai jingmut ïa ka EC ban shaniah ha ki kot ki sla kum ki Aadhaar card, ki kot rashon, bad ki kot ID jong ki nongthep vote ban pynthikna ïa ka jingpynshisha kaba hok bad kaba thikna. Ka jingbishar kaba bud kan long ha ka 28 tarik, Naitung.
