Bengaluru, Naitung:
Shisngi hadien ba u president jong ka seng BJP ha ka jylla Karnataka, u B.Y.Vijayendra u la kob ïa ka seng Congress ba kan pynpaw ïa ka kyrteng jong u President ka AICC u Mallikarjun Kharge kum u kyrtong ban ïakhun ïa ka shuki Myntri Rangbah, u Myntri Rangbah ka jylla u Siddaramaiah u la thalaiñ kylla, ha kaba u la ong ïa ka seng BJP ba kan ai rai bad pynbna da ka kyrteng jong u Myntri barim u Govind Karjol kum u kyrtong ban ïakhun ïa ka shuki Myntri Rangbah jong ka Karnataka.
U Siddaramaiah u la ong ba lada u Vijayendra u sngewkhia shisha ïa ka burom jong ki Dalit bad ki Backward Class balei um iehnoh ïa ka kyrdan kum u president ka BJP ka jylla bad tyrwa ïa ka ha u nongïalam Dalit bad pynbna ïa u kum u kyrtong Myntri Rangbah “Watla u (Karjol) mynta u la pynsawa ïa ki sur jong ka seng jong phi, hadien ba nga la ïatreilang bad u, nga lah ban pynshisha ba ha ka nongrim u dei u briew uba don akor. Lada phi bad ka seng jong phi ki ïoh mynsiem bad ki sngewskhem, pynbna ïa ka kyrteng jong u Karjol kum u nongïalam jong ka seng BJP ha ka jylla bad kum u kyrtong ban ïakhun ïa ka shuki Myntri Rangbah na ka bynta ka Karnataka,” la ong u Myntri Rangbah.
U Siddaramaiah u la ong ba lada donkam ïa ki sakhi halor kumno ka BJP ka pynjah burom ïa ki nongïalam ba sahdien ha ka rukom kaba ryntih, wat peit sha jngai ban ïa ka Karnataka.
“U S Bangarappa, u nongïalam ba pawnam jong ka Backward Class, u la shah pynkut noh ha ka saiñ pyrthei ha u kpa jong phi u BS Yediyurappa. Bad mynta, kok Vijayendra, phi pyrshang ban pynkut noh ïa ka kam saiñ pyrthei jong u khun jong u, u Kumar Bangarappa” ong u Myntri Rangbah ïa u nongïalam ka BJP.
U Siddaramaiah u la ong, la ka long u Bangarappa ne u Narendra Modi, ka jingshngaiñ jong ki ha ka BJP ka don tang katba ki dang kohnguh ïa ka agenda ka Hindutva kaba don ïa ka riti jaitbynriew. Ka jingleh jong ka BJP ïa ki Dalit bad ki jaitbynriew ba sahdien ka la long beit kaba shu leh tang ban paw shabar, u la bynrap.
Haba jubab ïa ki jingkren jong u Siddaramaiah, u Vijayendra u la ong ba ka Congress kam shym la pynlong Myntri Rangbah ïa u Mallikarjun Kharge, wat la ka la don ka lad ban leh kumta, bad ki briew jong ka jylla ki tip mano ba kitkhlieh halor kane. Halor ka jingai jingmut jong u Siddaramaiah ban jer kyrteng ïa u Karjol kum u kyrtong ha ka shuki Myntri Rangbah, u Vijayendra u la ong ba u Karjol u dei u heh nongïalam jong ka BJP, u DCM barim , bad mynta u dei u dkhot ka Parliament; baroh ki jingkhang jong ka lad ïa u ban kiew sha ki kyrdan kiba hakhliehduh ha ki por ban wan ki dang plie.
