New Delhi, Naitung:
Ka Myntri Rangbah jong ka Delhi ka Rekha Gupta ha kine ki khyndiat sngi ba la leit, ka la pynbna ba ka nongbah kan sa ïoh ban pdiang ïa ka jingïarap pisa kyrpang kaba T.600 klur na ka sorkar pdeng ha kaba kut jong u Naitung hapoh ka jingtreikam jong ka skhim Special Assistance to States/UTs for Capital Investment (SASCI).
Kane ka jingpynbna ka long hadien ka jingïakynduh bad ka Myntri pla tyngka jong ka sorkar pdeng ka Nirmala Sitharaman ha New Delhi. “Ka Myntri ka sorkar pdeng kaba dei khmih ïa katnat pla tyngka ka la ïasam ïa ki jingtip ba bniah shaphang ka skhim SASCI ha ka jingïalang jong ngi.
Hapoh kane, ka sorkar Delhi kan ïoh ïa ka jingïarap ba kyrpang kaba T.600 klur ha kaba kut jong une u bnai.
Ïa ka jingtyrwa na ka bynta ka mang tyngka shen yn sa phah sha ka tnad pla tyngka,” ong ka Gupta ha ka kyrwoh khubor.
Ka la bynrap ba ïa ka pisa yn pyndonkam ban pynsted ïa ki jingtei ba kongsan bad ki projek paidbah ha kylleng ka nongbah, kynthup ïa ki jingthmu kiba ïadei bad ka jingpynïaid ïa ka leit ka wan, ka jingpyntuid um, ka bor ding, ka jingpynjyrngam, bad ka jingpynïaid ïa ki jaboh jabaiñ.
Ka Gupta ka la ïaroh ruh ïa ka rukom treikam jong ka sorkar pdeng ha kaba ïadei bad ka jingïatreilang bad ka sorkar pdeng bad ai khublei ïa ka jingïalam jong u Myntri Rangbahduh ka ri u Narendra Modi na ka bynta ban kyntiew ïa ka “jingroi ba ïatreilang” ha kylleng ki jylla bad ki jaka jong ka sorkar pdeng.
“Hapoh ka jingïalam jong u Myntri Rangbahduh ka ri, ka polisi pynroi ba ïatreilang jong ka sorkar pdeng ka la ai ïa ka Delhi ïa ka lynti bad ka jingkhih kaba thymmai. Ki paidbah ka Delhi mynta ki sakhi ïa ka jingmyntoi na kane ka jingïatreilang hapdeng ka sorkar pdeng bad ka jylla,” ka la ong.
Ïa kane ka skhim la sdang ha u snem 2020-21 kum shi bynta jong ka buit pynthymmai ïa ka ïoh ka kot hadien ka jingwan lynshop ka Covid, kane ka skhim SASCI ka ai ram khlem jingsiew sut na ka bynta 50 snem sha ki jylla bad ki UT ban kyrshan ïa ka jingpynlut pisa.
Ka skhim ka thmu ban kyntiew ïa ka jingpynroi ïa ki jingtei, ka jingpynmih kam, bad ka jingroi kaba neh da kaba pynkhlaiñ ïa ki bor jong ki jylla lyngba ka jingai pisa kaba jlan bad ki jingpynshlur ban wanrah ïa ki jingpynkylla.
