New Delhi, Naitung:
Katkum ki khubor, la ong ba u Myntri Rangbahduh ka ri India, u Narendra Modi, un sdang ia ka leit jngoh kaba saw sngi sha United Kingdom bad Maldives ka ban sdang naduh ka Sngi Balang ban pynskhem ïa ka jingïadei hapdeng ka India bad kitei ki ri marjan bad ban pynlong aiñ ïa ka jingïateh soskular khaïi pateng kaba laitluid hapdeng ka India bad ka UK kaba la thmu ban plie lad ban pynkiew ar shah ïa ka khaïi pateng arliang ha u snem 2030 na kaba long mynta.
U PM Modi un leit nyngkong sha UK ha ka jingleit kaba ar sngi bad hadien kata un sa leit sha Maldives, ban iadon bynta ha ka sngi ba kyrpang jong ka jingrakhe ïa ka Sngi Laitluid jong katei ka ri kum u “symbud kongsan”.
Ka jingleit jngoh jong u Myntri Rangbahduh sha Maldives naduh ka 25 haduh ka 26 tarik u Naitung, la shim ba ka long kaba kongsan namar ka long ka dak jong ka jingpynkylla kaba khraw ïa ka jingïadei hapdeng ki ar ri kaba la wan hapoh ka jingeh kaba jur hadien ba u Mohamed Muizzu, uba la pawnam na ka bynta ka jingkyrshan jong u na ka China, u la long kum president ha u Naiwieng 2023.
Ha ka bynta ba nyngkong jong ka jingleit, u Modi un leit sha UK naduh ka 23 haduh ka 24 tarik u Naitung ban pynlong ia ka jingiakren kaba jylliew bad u Myntri Rangbahduh ka ri Britain u Keir Starmer.
La khmih lynti ba ka India bad ka UK kin iasoi tikna ia ka jingiateh soskular na bynta ka khaïi-pateng kaba laitluid ha ka por ba u Modi un leit sha London, da kaba bynrap ba ka liang jong ka ri Bilat ka la pyndep ia ka rukom pyniaid na ka bynta ban pyniaid sha khmat ia ka soskular.
Ha u bnai Jymmang, ka India bad ka UK ki la iasoi ia ka soskular khaïi pateng- ka Free Trade Agreement (FTA) kaba la khmih lynti ba kan ai jingmyntoi kumba 99% ia ki mar ka India na ka jingsiew dor bad kan pynsuk ia ki kompeni jong ka ri Britain ban shalan ia ki jingdih kum ka kyiad, ki waiñ, ki kali bad kiwei kiwei ki mar sha India nalor ba kan kyntiew ia ka khaïi pateng baroh kawei.
Kumta la ong ba ka Britain ka la pynbna ba kan pynduna ïa ki khajna jong ka India, da kaba khanglad ïa ki jingpynhiar 90% ha liang ka khajna, ha kaba 85% na kine kin long kiba lait khajna pura hapoh shisnem.
Ka FTA kan pynkiew ar shah ia ka khaïi-pateng hapdeng kine ki ri ha u snem 2030 na ka kyrdan kaba mynta kaba long USD 60 billion, la ong ki heh sorkar.
U PM Modi un pynlong ïa ki jingïakren kiba jylliew bad u PM Starmer halor ka jingïadei baroh kawei hapdeng ka India bad ka UK nalor ka jingïasam jingmut halor ki mat kiba kongsan ha ka thaiñ bad ha ka pyrthei.
Kane ka sien leit jngoh kan dei ruh ka sien leit jngoh kaba saw jong u Myntri Rangbahduh ka India ia ka Britain.
