Chennai, Naitung:
Kum ban kyntait halor ka jingong ba lah ban don ka sorkar synrop, u nongïalam ka Liang Pyrshah jong ka Tamil Nadu, u Edappadi Palaniswami (EPS) ha ka jingleit jngoh jong u sha ka jylla baroh kawei shwa ka ilekshon sha ka Ïingdorbar Thaw Aiñ ha u snem 2026, u la kynthoh ïa u nongïalam ka DMK bad Myntri Rangbah ka jylla, u MK Stalin bad ong ba ka AIADMK kam dei ka sorkar kaba biej, hynrei kan thaw ïa ka sorkar kaba laitluid.
Ha ka por ba la don ka Campaign lyngba ka durkhih ha ka miet jong ka sngi Saitjaiñ, u EPS u la ïasam ïa kawei ka jingjia na ka jingïalang jong ka ïingdorbar ha kaba u la ong ba u Stalin u la ïeng ha la ki kjat bad u la kylli beit ïa u balei ka AIADMK ka la pynskhem bad ka BJP hadien ba u la ong ba ym don jingpynïasuk kaba lah ban long.
“Nga la sngewkyndit bad nga la lyngngoh balei u Myntri Rangbah ka jylla u kylli ïa nga ïa kane ka jingkylli”, la ong u EPS. “Nga la jubab ïa u ba ka AIADMK ka dei ka seng jong ngi bad ngin sa ïateh lok katkum ka jingkwah jong ngi, nga la kylli ïa u balei u tieng bad u la shong noh.” U EPS u la bteng ba u Stalin u tieng ïa ka jingïatreilang jong ka AIADMK bad ka BJP. Ka durkhih jong katei ka jingïalang ka la saphriang bha ha ka sngi U Blei.
“U Stalin u ong ruh ba ka AIADMK kan thaw sorkar lang bad ka BJP. Ko Stalin, ngim dei ki briew kiba biej. Ka AIADMK kan jop da ka jingbun paid bad thaw sorkar da kaba laitluid. Ngin sa rai la ngi kwah ïatehlok ne em. Ki seng kiba don kajuh ka jingmut ban ïasoh bad ngi. Ka BJP ka kheiñ ïa ka DMK kum ka seng ba bamsap bad ka kwah ban pynliem ïa ki. Dei na kata ka daw ba ka BJP ka la ïasoh bad ngi bad kiwei pat ki seng kin ïasoh bad ngi bad ngin pynliem ïa phi.”
Ka AIADMK bad ka BJP kiba la ïatylli lang ha u bnai Ïaïong mynta u snem hadien ba ka la don ka jingïapher jingmut la kumba 19 bnai, ki la ïa pyrshah iwei ia iwei pat halor ka mat ïasamlang ïa ka bor. U EPS u la pynshai mynshwa ba kam don kano kano ka jingïapher jingmut bad ka BJP halor katei ka mat, u la bynrap ba un long u kyrtong ban ïakhun ïa ka shuki Myntri Rangbah bad un sa shim ïa ki rai baroh.
Ka jingpynlong ïa ka sorkar synrop ka la pynmih ïa ka jingïakren ha ka saiñ pyrthei bad ka jingpynphai biang na ka AIADMK. Ki heh nongïalam jong ka AIADMK ki la ong ba ki nongthep vote jong ka Tamil Nadu kin kyntait ïa ka sorkar synrop da kaba ai nuksa ïa ka ilekshon sha ka ïingdorbar thawaiñ jong u snem 1980 ha Tamil Nadu – haba ka DMK bad ka Congress ki la tyrwa ïa ka sorkar synrop, ki briew jong ka Tamil Nadu ki la kyntait ïa ki bad ki la jied ïa ka AIADMK kum ka seng kaba heh tam marwei.
