Chennai, Naitung:
U A Anwhar Raajhaa, uba long u MP barim bad u nongïalam jong ka liang pyrshah ka AIADMK ha Tamil Nadu, u la leit ban pynïasoh bad ka seng liang pyrshah kaba bat ïa ka jingsynshar ka DMK ha ka Lah Sngi U Blei, khyndiat kynta hadien ba u la shah beh na ka seng AIADMK lyngba u General Secretary u Edappadi Palaniswami (EPS) halor ka jingkynnoh ba u la leh ïa ki kam pyrshah seng hadien ki jingkren pyrshah ïa ka jingïatreilang jong ka seng bad ka seng BJP na ka bynta ban ïakhun ïa ka ilekshon Assembly 2026.
“Kam dei ka jingïatreilang, ka AIADMK ka shah riam ha ki kti jong ka BJP”, la ong u Raajhaa ha ki nongthoh khubor shabar jong ka ophis treikam jong ka seng DMK.
U Myntri jong ka sorkar pdeng uba dei khmih ïa ka tnat ki kam pohïing u Amit Shah u la pynïeng ïa ka jingsam bor ïa kaba la pynpaw biang da u President barim ka jylla u K Annamalai ha ka taïew ba la dep haba u la ong ba lada ka AIADMK ka don jingeh ïa kata ki dei ban kren beit beit bad u nongïalam ka BJP ha ka thaiñ.
Na ka jingdon jong kine ki jingkynthoh jong u Annamalai bad ka jingkynthoh jong u Stalin ïa ka kynhun synrop, u EPS u la ong shisngi shwa kane, “kiba ha ka seng AIADMK kim dei kiba biej” na ka bynta ban thaw ïa ka sorkar synrop.
“U Myntri ka tnat ki kam pohïing u la ong lai sien lai wat ba kan don ka sorkar synrop ha Tamil Nadu. Ym tang shisien ruh um shym la ong ba u EPS un long u Myntri Rangbah. Um shym la kdew satia ïa ka kyrteng jong u EPS”, la ong u Raajhaa.
“Kumjuh kumba u Trump u la ïai ong ba u la pynïasuk hapdeng ka India bad ka Pakistan, u EPS u kam ba u dei u kyrtong ban ïakhun ïa ka shuki Myntri Rangbah…Ka mat ïakren jong ka BJP ka long ban pynpait-pynpra ïa ka AIADMK bad ban long ka liang pyrshah ba kongsan ïa ka DMK,” u la ong haba kdew ïa kijuh ki rukom leh saiñ pyrthei ha West Bengal, Karnataka bad Maharashtra.
“U la duh noh ïa ki nongrim jong u, u la duh noh ïa ka jingshakri jong u ïa ki paidbah”, la ong u Narayanan, u Vice President ka BJP ha ka jylla.
“Ka seng ka la ai ïa u haduh katne, bad mynta ba phi don ki jingïapher jingmut, kam long kaba dei ban pynkylla ïa ka jinglong ba ïaineh jong phi sha ka DMK. Mynta u la shah rem. U riew shimet um lah ban wanrah jingeh ïa ka seng, u dei tang u briew… Kino kino ki skhim ba la ai da ka sorkar BJP kim dei kiba phiah ha ki rit paid ne ki paidbah kiba heh. Ka politik kaba pynshong nongrim ha ka jingroi jong ka baroh ki long kiba ïaryngkat ngim ïohi ïa ka niam…”
Kane ka dei ka sien kaba ar ba u Raajhaa u la shah beh noh na ka seng AIADMK.
U la shah beh ha u snem 2021 namar ba u kyrshan ïa u nongïalam ba la shah beh u VK Sasikala ban rung biang sha ka seng AIADMK.
Hynrei ïa u Raajhaa la wanïalam biang ha u snem 2023 hadien ba ka AIADMK ka la mih noh na ka jingïatreilang bad ka BJP da kaba kynnoh ïa u Annamalai ba u la pynjah burom ïa ki nongïalam jong ka.
Ha ka 11 tarik, Ïaïong, u Shah u la pynbna ba ka AIADMK bad ka BJP kin ïakhun lang ha ka ilekshon 2026 bad u la bujli noh da u Annamalai bad u Nainar Nagendran ha ka jaka jong u.
U Raajhaa u la shah jied kum u MP bad MLA na ka Elaka Ramanathapuram jong ka Tamil Nadu kaba dei ka Elaka kaba bun jait ki rit paid.
U la long u Myntri ka tnad Labour ha ka kynhun Myntri jong ka J Jayalalithaa hapdeng u snem 2001 bad 2006.
