Amritsar, Naitung:
Ka Amritsar Airport, ka la ïoh ïa ka khubor pyntriem jong ka jingshah byrngem buh bad pynbthei bom, hadien ba ki briew ki bym lah ban ithuh, lyngba ka phone, ki la pyntip sha ki bor pynïaid jong ka kad liengsuiñ, ba ka lah ban don ka jingbthei bom.
Ka jingbyrngem ka la pynlong ïa ki bor pahara ba kin pynkhlaiñ ïa ki jingleit thwet, ha kaba ki pulit ki la buh da ka jingujor mukotduma bad kumjuh ban pynlong ïa ka jingtohkit.
Ki bor pynïaid ki dang buddien mynta ban lap ïa u nombar phone ba la pyndonkam na ka bynta katei ka jingphah ïa ka khubor byrngem. La pynkhlaiñ ïa ki lad jingïada hapoh bad sawdong-sawkun jong ka kad liengsuiñ.
Kane ka jingbyrngem ka la wan hadien katto katne sngi ba ka Shiromani Gurdwara Parbandhak Committee (SGPC) ka la ïoh pdiang ïa ki email ha kine ki khyndiat sngi ba la dep kiba byrngem ban pynbthei ïa ka Golden Temple. Ka SGPC, ka kynhun kaba heh kaba dei peit ïa ki kam niam Sikh, ka la ujor biang sha ki pulit bad dawa ban tohkit kaba bniah.
Wat hapdeng kiba bun ki jingbyrngem, u MP ka Congress u Gurjeet Singh Aujla u la kynthah ïa u Myntri Rangbah ka Punjab u Bhagwant Mann halor ka jingbym wan jong u ha Amritsar.
“Mynta ka sngi ka dei ka sngi kaba hynriew jong kine ki jingbyrngem, hynrei u Myntri Rangbah ka Jylla u Bhagwant Mann um shym la wan shane wat tang shisien ruh”, la ong ka Aujla haba pynpaw ïa ka jingsngewkhia halor ka rukom pynïaid jong ka jylla ïa kane ka jinglong jingman.
U la ban jur ruh ba ka jingpynskhem ïa ka Golden Temple ka dei lang ka kamram jong ka sorkar pdeng bad ka sorkar jylla. “Ka jingpahara sawdong ka Golden Temple ka dei ka kamram jong ka sorkar pdeng bad ka sorkar jylla”, la ong u Myntri Rangbah ha ki lad pathai khubor.
Ha ka Sngi Thohdieng, ki pulit ki la kem ïa uwei u Software Engineer na Faridabad ha kaba ïadei bad kitei ki jingbyrngem. Hynrei, kawei pat ka email kaba byrngem ka la mih naduh kata ka por, kaba pynthymmai ïa ki jingsngewkhia shaphang ka jingshngaiñ jong kawei na ki jaka ba kyntang tam jong ki Sikh.
