New Delhi, Naitung:
Ki la don saw ngut ki lehnoh kiba don jingïadei bad ka al-Qaeda kiba donkti ha kaba pynïaid ïa ka kam khaïi pisa thok bad pynphriang ïa ka jingmut jingpyrkhat jong katei ka kynhun lehnoh ha ka pyrthei, ki la shah kem ha ka kynhun pyrshah lehnoh jong ka Gujarat (ATS). Uwei na kitei u dei uba la shah kem na kawei pat ka jylla, la ong ka kynhun ATS.
Kine ki lehnoh ki dei kiba la tip kyrteng kum u Mohd Faiq, u Mohd Fardeen, u Sefullah Kureshi, bad u Zeeshan Ali – ki la pyndonkam da ki rynsan ka Social Media bad ki app kiba suba ban pynsaphriang ïa ka rukom pyrkhat jong ka al-Qaeda, ong ki tyllong khubor.
Ki la pyndonkam da ka Auto-delete apps ban pynkhuid ïa kino kino ki dak jong ka jingpynïadei jong ki, la ïathuh ki tyllong khubor.
Kine kiba shahkem mynta ki dang shah tohkit, ki la ïathuh.
Ki ophisar jong ka Gujarat ATS ki la ïathuh ba kine ki nongshah kynnoh ki dei kiba don jingïadei bad kane ka seng lehnoh la slem bah.
Ki la wan ban ïakynduh bad ka al-Qaeda ha ki lad pathai khubor.
Kine ki saw ngut ki la wan ha ka Radar jong ka kynhun ATS hadien ba la lap ïa ki ba ki ïakren halor ki kam lehnoh ha kane ka jylla. Ka Gujarat ATS ka la ong ba ki dang bishar bniah ïa ki Chat bad ki Social Media.
Ka al-Qaeda ka la mih na ka Makhtab al-Khidamat, kaba la thaw da u nonghikai jong u Osama bin Laden, u Sheikh Abdullah Azzam, kum ka seng ban ai pisa ïa ki lehnoh ha Afghanistan.
Ka al-Qaeda, ki kynhun ba ïatreilang bad ka, bad kito kiba ïoh mynsiem na katei ka kynhun ki la don bynta ha kaba thmu bad pyntreikam ïa ki kam thombor ha Africa, Asia, Europe bad North America.
Naduh ba la seng ïa ka haduh u snem 1991, ka al-Qaeda ka don ha Afghanistan bad ha Peshawar jong ka Pakistan.
Naduh u snem 1996 haduh kaba kut jong u snem 2001, la pynïaid ïa ka da u Bin Laden bad ki dkhot ka kynhun lehnoh na Afghanistan hapoh ka jingïada jong ki Taliban.
