Chennai, Naitung:
U General Secretary jong ka AIADMK u Edappadi K Palaniswami, u la pynpaw ka jingbynñiaw lada ka sorkar kam pdiang ban pyntreikam ïa kiba bun ki skhim sorkar. Haba shim kyrpang ïa ka jingkren jong u Myntri ka sorkar pdeng u Dharmendra Pradhan ba ka Tamil Nadu kan duhnong lada kam pdiang ïa ka skhim PM-Shri, u Palaniswami u la ong, “Ka jingkyntait ban pyllait ïa ka Samagra Shiksha (SS) Funds bad ka jingpynbor ïa ka sorkar jylla ban pdiang ïa ka NEP kan sa long kum ka jingshet kylla ïa ki khynnah skul, ki nonghikai bad ki paidbah ha TN.”
Haba pynpaw ba kane ka jingkren jong u Myntri ka sorkar pdeng ka la pynkyndit bad pynbitar ïa ki paidbah ka Tamil Nadu, u Palaniswami u la ong ba ka AIADMK ka skhem beit ha ka polisi ar tylli ki ktien bad ka sorkar pdeng ka dei ban iehnoh ïa ka jingpyrshang jong ka ban pynjari ïa ka polisi lai ktien ha Tamil Nadu.
U nongïalam ka AIADMK, ha ka jingpynbna hangne, u la ong ba ka sorkar pdeng ka dei ban pyrkhat ïa ka jingmyntoi jong ki paidbah, ban pynlong ïa ka jingïamir jingmut kaba bniah bad ka sorkar jylla bad ban poi sha ka rai kaba sngewtynnat.
Kane ka jinglong jong ka sorkar pdeng ka la pynrung ïa ka jingtieng ha ki paidbah ka Tamil Nadu ïa ka lawei jong ki khynnah bad ka la wanrah ïa ka jingbishni bad jing-sngewsih pyrshah ïa ka sorkar pdeng.
“Ka sorkar kmie ka dei ban pyllait mardor ïa ka pisa na ka bynta ki prokram kum ka SSA khlem kano kano ka kyndon. Nga kyrpad ïa ka sorkar DMK ba kan kiar na kaba ïashim bynta ha ki jingïakren bym myntoi bad ban pan jingmut kaba tei ïa ka sorkar pdeng ban rai ïa ka jingbha jingmiat jong ki paidbah. Ka DMK ka dei ruh ban buh ha ka jingmut ba ki paidbah ka Tamil Nadu ki la jied 39 ngut ki MP tang ban ïakren halor kum kine ki mat ha Parliament” bynrap biang u Palaniswami.
“Haduh kine ki sngi, la bud ryntih ïa ka polisi ar tylli ki ktien – ka ktien kmie Tamil bad ka ktien pynïasoh – ha Tamil Nadu. Namar kane ka rai kaba stad, ki samla pule jong ka Tamil Nadu ki don ha khlieh duh ha ka kyrdan pyrthei. Nalor kata katkum ka jingdonkam jong ki, ki nang ruh ïa ki ktien jong kiwei pat ki jylla bad kumjuh ruh jong ki ri. Kumta, ha kane ka por, ka polisi lai ktien kam long kaba donkam na ka bynta ka Tamil Nadu,” u la bynrap.
