Jaipur, Naitung:
Ki la don kumba 7 ngut ki khynnah skul kiba dang rit kiba la duh noh ïa la kajong ka jingim bad 28 ngut kiwei pat ki la mynsaw hadien ba ka bynta jong ka ïing skul Upper Primary jong ka sorkar ka la twa ha ka shnong Piplodi jong ka Jhalawar distrik jong ka Rajasthan ha ka step sngi Thohdieng. Kane ka jingjia ba sngewsih ka la jia ha ka por ba ki khynnah pule ki dang ïalum lang ban duwai mynstep.
U Nandkishore Verma, u SHO jong ka thanat Manoharthana u la ïathuh ba ka bynta jong ka ïing skul ba shong ki klas 6 bad 7 ka la twa ha ka por kumba 7:45 baje mynstep, ha kaba ka la tep ïa kumba 35 ngut ki khynnah hapoh ka jingtwa. “Hynñiew ngut ki khynnah ki la ïap haduh ba la thoh ïa kane ka khubor.”
Kine kiba la ïap ki dei kiba la tip kyrteng kum ka Payal (14), Priyanka (14), Harish (8), Sona Bhai (5), bad Mithun (11), kine baroh ki dei na ka kynhun jaitbynriew Bhil; u Kartik (18) na ka kynhun Lodha; bad ka Meena (8), kaba dei ka khun jong u Chhotulal Raidas. Kine baroh ki dei ki nongshong shnong jong ka shnong Piplodi.
Ka la don ka jingkulmar ha kane ka skul haba la jia ka jingjia, ki la paw ha katei ka jaka, ha kaba ki kmie ki kpa, ki nongshong shnong bad ki nonghikai kiba la dap da ka jingsngewsih ki la ïaleh ban tan ïa ki khynnah napoh ka jingtwa. Bun ki khynnah pule, kiba la mynsaw la pynkit mar mar sha ki hospital da ki kali shimet shwa ba ki jingïarap ki bor sorkar kin poi. Ki don 9 ngut ki khynnah pule kiba la shah sumar ha ICU ha katei ka hospital jong ka distrik, ha kaba ki Surgery kiba bun ki dang ïaid shakhmat.
