Shillong, Naitung 25
Ka lympung ïalehkai SSA SRGT 3rd Division Football League 2025 ka dang bteng ha ka Sngi Thohdieng ka 25 tarik u Naitung 2025 ha madan SSA Football Stadium, Shillong da ar tylli ki jingïalehkai. Ka jingïalehkai ba nyngkong ka la long ha ka por 1:30 nohphai sngi hapdeng ka Lamlynti FC pyrshah ïa ka Mawkriah West SC. Ka Mawkriah West SC ka la jop da 4-1 kol ha kaba ki kol la ïoh ban thep da u Deverson Kharbudnah ha ka minit 6 & 50 bad u Shailang Nongspung ha ka 24 & 39 minit, katba ka shi kol jong ka Lamlynti FC la thep da u Kyrmenskhem Nongbet ha ka 65 minit.
Ka jingïalehkai kaba bud ka la long ha ka por 4 baje janmiet ha kajuh ka jaka ha kaba ka Umrynjah SC ka la jop kput haduh 8-0 kol ïa ka Imson SC. Ki kol jong ka Umrynjah SC la thep da u Marchborn Shylla ha ka 3 minit, u Eleewell Kurbah 20 & 53 minit, u Wanborlang Nongbri ha ka 36, 63, 69 & 80 minit bad u Banshemphang Nongkhlaw ha ka 61 minit.
Kane ka lympung ïalehkai kan dang bteng lashai ka Sngi Saitjaiñ ka 26 tarik u Naitung 2025 ha kajuh ka jaka lyngba ar tylli ki jingïalehkai. Ha ka por 10:30 mynstep ka Ïatyllilang SC kan ïakhun pyrshah ïa ka Madan S&CC bad ha ka por 1:00 nohphai sngi ka Laitlyngkot SC kan ïakhun pyrshah ïa ka Umïew Maw U Sam.
