Agartala, Naitung:
U heh ka Tipra Motha u Pradyot Kishore Debbarma u la ong ba ka Election Commission of India (ECI) ka la pynthikna ban pynlong ïa ka Special Intensive Revision (SIR) ïa ka thup kyrteng thep vote ha Tripura, kaba ïasyriem bad ka jingpynkhreh kaba dang shen ha Bihar.
Hadien ka jingïakynduh ïa u Chief Election Commissioner u Gyanesh Kumar ha New Delhi, u Debbarma u la ïathuh ha ki nongthoh khubor ba ka ECI ka la sngap ïa ki jingeh jong ki bad pynthikna ba ïa ka SIR yn pyntreikam ha ka ri baroh kawei, kynthup ha Tripura.
Ka kynhun na Tipra Motha kaba kynthup ïa ki Myntri, ki MLA, bad u Chief Executive Member jong ka Tripura Tribal Areas Autonomous District Council (TTAADC) ki la aiti ïa ka jingkynmaw sha ka ECI.
Ka jingthoh jingkynmaw ka la kynnoh ba la pynrung ïa ki nongwan buhai shnong ki bym don kot don sla ha ka thup nongthep vote jong ka jylla, kaba ktah ïa ka hok saiñ hima sima bad ka jinglong jong ki jaitbynriew ne trai ri trai muluk.
Ka seng ka la kynnoh ba ïa ki ID jong ki nongthep vote bad ki kot ki sla ba thikna la ïoh lyngba ki lad thok, ba la pynsuk da ki nongkhaïi trai ri bad ki heh sorkar ba bamsap. Ki la ong ba kane ka buh jingma ïa ka rukom buh kyrpang ïa ki jaitbynriew Scheduled Tribe (ST) bad ka rukom pynïeng ïa ki jaitbynriew.
Ka jingthoh jingkynmaw ka kynthup ïa ka jingdawa ban pynshisha ïa ki nongthep vote na ïing sha ïing, ban pynlong da ki heh sorkar na shabar jong ki konstitwensi kiba shah ktah ban pynthikna ïa ka jinglong pdeng. Ka seng ka la khot ruh ban buddien bad ban ai jingkitkhlieh kham pyrkhing ha ka jingpynkylla.
Ha ka liang ki kam saiñ pyrthei, u Debbarma u la pynpaw biang ïa ka jinglong laitluid jong u Tipra Motha. U la ong ba ka seng ka phaikhmat eh ban ïada ïa ka bha ka miat jong ka Tripura bad ba kiwei ki seng saiñ pyrthei ki laitluid ban ai jingmut bad ka ECI.
U la pynpaw ruh ïa ka jingsngewkhia halor ka jingpynslem ban pyntreikam ïa ka Tiprasa Accord. U Debbarma u la pynpaw ba ka seng ka la pynïasoh bad ka sorkar katkum ki jingpynthikna ha kaba ïadei bad ka jingïateh kular bad u la maham ba ka jingpynslem kaba bteng ka lah ban wanrah ïa ka jingpyrkhat biang ïa ka jingkyrshan jong ki.
