Bengaluru, Naitung:
Ka Toyota Kirloskar Motor Pvt. (TKM), kaba ïatreilang hapdeng ka Toyota Motor Corporation bad ka Kirloskar Systems Ltd., ka la rakhe ïa ka jingdap 27 snem jong ka jingtreikam ha India da kaba ïalam ïa ki lad pathai khubor ban let jngoh ïa ka jing-angnud jong ka ban pynneh pynsah, pyntbit, bad pynïar ha ka ri India.
La seng ha u snem 1997, ka TKM ka la lah ban pynheh ïa ka ïew die kali shong paidbah da kaba bei tyngka haduh T.17,600 klur bad ki nongthied ki la kot sha ka palat 2.8 million ngut. Da ki ar tylli ki karkhana kiba treikam pura ha Bidadi, Karnataka, kane ka kompeni ka shna ïa ki model kiba pawnam kum ki Innova Crysta, Fortuner, Camry Hybrid, bad Urban Cruiser Hyryder. Ka karkhana kaba lai kaba don ka jingbei tyngka kaba T.3,300 klur ka dang ïaid shakhmat, kaba la buh ban pyndap 100,000 unit man la u snem bad ban pynmih 2,000 tylli ki kam.
La ailad ïa ki nongpathai khubor ban ïoh jingtip kaba jylliew shaphang ki jingpyrshang ban pynroi ïa ki nongtrei ha ka Toyota, kynthup ïa ka Toyota Technical Training Institute (TTTI), kaba la lah dei ai jinghikai ïa palat 1,400 ngut ki samla pule da kaba ïoh ïa ka kam kaba 100%. Ka jingpynïar ïa ka TTTI mynta ka lah ban pdiang ïa 1,200 ngut ki samla pule, kynthup ïa 600 ngut ki samla kynthei, kaba kyntiew ïa ka jingpynrung ïa ki shynrang bad kynthei ha ki kam khaïi kali. Kiwei pat ki jingthmu pyntbit kum ka Toyota Kaushalya, T-TEP, bad ka Toyota Gurukul ki la ai jinghikai ïa ki hajar ngut kiwei pat ha kylleng ka ri India.
Ka jingpynneh pynsah ka la long ka mat ba kongsan ha ka ka Fam Tour, kumba ka TKM ka la pyni ïa ka jingbud ryntih jong ka ïa ka Toyota Environmental Challenge 2050. Ka kompeni ka la ïoh ïa ka jingpyndonkam ïa ka bording kaba lah ban pynthymmai 100% bad ka pyndap haduh 90% na ka jingdonkam um pynmih jong ka lyngba ka um ba la pyndonkam biang bad ba la lum na u slap. Lyngba ka jingpynpoi marbam kaba jyrngam, kynthup ïa ka jingpynmih dang shen ïa ki 17 tylli ki trok EV, ka TKM ka la pynduna palat 62,000 ton ïa ka jingmih CO2 ha u snem mang tyngka 2023-24.
Ki nongïashim bynta ki la leit jngoh ruh ïa ka Toyota’s Ecozone, ka jaka hikai kaba heh 25 akar na ka bynta ka jinghikai shaphang ka mariang. Kumba palat 42,000 ngut ki briew kiba la ïashim bynta haduh mynta, kane ka jingthmu ka pynksan ïa ka jingim kaba pyrkhat ïa ka mariang naduh dang rit. Naduh u snem 2009, ka kompeni ka la thung 328,000 tylli ki dieng, kaba pynroi ïa ki jingthaw ba im da palat 790 jait ki jingthung bad 410 jait ki mrad.
Ka MoU ba dang shen jong ka TKM bad ka Sorkar Maharashtra ban wad ïa ka jaka shna tiar ba thymmai ha Chhatrapati Sambhaji Nagar ka ïahap bad ka buit treikam jong ka Toyota ha ka pyrthei ban pynlong ïa ka India kum ka jaka bakhuid ba suba. Ka kompeni ka la plie ruh ïa ka ophis thaiñ kaba thymmai hangtei bad ka la ïasoi ïa ka jingïateh bad ka Ohmium International ban ïatreilang ban pynmih ïa ki lad pynkhuid Hydrogen kiba jyrngam.
