Bengaluru, Naitung:
Wat haba u Myntri Rangbah ka Karnataka, u Siddaramaiah u la ong ba ka don ka jingkiew ha ka jingdawa ïa ka dawai sboh urea bad ba kane ka jingduna ka wanrah ïa ka jingbymsuk hapdeng ki nongrep, ka Department of Fertilisers (DoF) ka la pynskhem ba ka dang buddien bha ïa ka jinglong jingman ban pynthikna ba ki nongrep jong ka jylla kin ïoh ïa ka sboh Urea ha ka por kaba biang ha baroh kawei ka añom Lyiur.
“Ka DoF ka la pynthikna ïa ka jingïoh ïa ka urea ha ka por kaba biang bad 8.73 lak MT pyrshah ïa ka jingdonkam katkum ka Pro-rata kaba long 6.3 lak MT sha ka jylla Karnataka ha ka aïom Lyiur jong u 2025 kaba dang ïaid shakhmat haduh mynta. Ha kum kane ka por, ka jylla ka la don ka jingdie kaba long haduh 7.08 LMT, kaba kham bun ban ïa ka jingdonkam ha ka Pro-rata,” la ong ka Department of Fertilisers, haba jubab ïa ka shithi jong u Siddaramaiah kaba la phah sha u Myntri ka tnad Health and Family Welfare and Chemicals and Fertilisers u Jagat Prakash Nadda.
Kane ka jingkhmih bniah, ka long shi bynta ban ai jingmyntoi ïa ki nongrep kiba ïakynduh jingeh na ka por sha ka por ha kaba ïadei bad ki dawai sboh, naba ka jingduna jong kine ki jait dawai kan ktah shibun ïa ki mar rep jong ki khamtam ha kum kane ka aïom ba donkam ban rep ïa shibun ki jait jingthung jingtep.
Ka DoF ka la bynrap shuh shuh ba ka dang bteng ban buddien bha ïa ka jinglong jingman bad ban ïatreilang bad ka sorkar Jylla ban pynthikna ba ki nongrep jong ka Karnataka kin ïoh ïa ka urea ha ka por kaba biang ha baroh ka aïom Lyiur.
Ha ka shithi sha u Nadda, u Siddaramaiah u la pynpaw ba ka sorkar pdeng ka la mang 11,17,000 MT ka urea sha ka jylla Karnataka na ka bynta ka aïom Lyiur jong une u 2025, ha kaba ka jingbun kaba la pynbiang haduh kane ka sngi ka long tang 5,16,959 MT, katba ka jingdonkam jong ka jylla naduh u Ïaïong haduh u Naitung, ka la long 6,000 MT.
Katto katne na ki kompeni sboh ki la pynpaw ba kim lah ban pynbiang ïa ka sboh urea katkum ba la mang da ka sorkar India, la ong u Myntri Rangbah.
