Shillong, Naitung 27
Uwei u samla pule uba dang 19 snem ka rta na ka VIT Vellore u la kam ba u aplai ïa ka All India Football Federation (AIFF) da kaba u la pynpaw ba u la phah lyngba ka email sha ka bor pynïaid katei ka synjuk ha ka kyrteng u khlur ïalehkai phutbol barim ka Spain u Xavi ban aplai ïa ka kam coach jong ka kynhun ïalehkai phutbol ka ri.
La ïathuh ba utei u samla pule u la pynpaw ha ka kotkhubor The Telegraph Online ba u la shna ïa ka email id thok ‘[email protected]’ bad u la pan ïa ka jingthoh na ka ChatGPT ban thoh ïa ka email kaba pynpaw ïa ka jingsngewtynnad ïa ka kam head coach kaba lait thylli jong ka kynhun ïalehkai phutbol ka India.
Na ka liang ka AIFF ka la pynpaw ba ki la ïoh ïa ka aplikeshon na u Xavi, hynrei ka jingbym lah ban thung ïa utei u khur rangïalehkai jong ka Barcelona ka long kaba palat ïa ka jingtyrwa kaba shisha.
Hadien shisngi ba la mih ki khubor ba u Xavi, u la pynpaw ba u kwah ban shimti ïa katei ka kam kaba lait kum u coach ka kynhun ïalehkai jong ka ri India, ki tyllong khubor kiba ïajan bad utei u nongjop jong ka World Cup, ki la pynpaw ba ka AIFF ka la pyndonkam bakla ïa ka kyrteng jong u, ban pynïar ïa ka kyrdan jong ka kam.
Ki tyllong khubor kiba ïadei bad utei u khlur ïalehkai barim ka Barcelona ki la pynskhem ba u Xavi um shym la aplai satia ïa katei ka kam bad ki la ai jingmut ba ka AIFF ka la pyndonkam ïa ka kyrteng jong u ban pyni ïa ka jingpynpaw pyrthei bar wat ki khlur ïalehkai ki kwah ban shimti ïa katei ka kam kaba lait.
Hadien ka AIFF ka la kam ba ki aplikeshon na u Xavi bad u Pep Guardiola na ka bynta ka kam coach jong ka kynhun ïalehkai phutbol jong ki shynrang jong ka India kim dei kiba shisha.
Kumba ka paw u Xavi u la phai khmat sha ka kam coach hadien ba u la shongthait noh na ka kam ïalehkai. Kham hashwa utei u khlur ïalehkai ka Spain u la ïohpdiang ïa ki trophy, kynthup ïa ka khusnam FIFA World Cup, ar sien ïa ka UEFA Euro, bad bun ki khusnam shimet. Nyngkong eh u la shimti kum u coach ha ka Al Sadd hashwa ba un shimti ïa ka kam ha ka Barcelona ha ka saw snem mynshwa, ha kaba u la ïalam ïa katei ka kynhun ban rah ïa ka nam ha ka La Liga ha ka samoi ba nyngkong ba u la shimti kum u coach ïa kane ka klob kaba u la ïalehkai naduh ba u dangkhynnah.
Katto-katne ngut ki ‘riew pawkhmat kiba la kwah ban shmti ïa kane ka kam ki kynthup ïa u khlur ïalehkai barim ka Liverpool u Robbie Fowler, Stephen Constantine, Steve Kean, Khalid Jamil, Kibu Vicuna, bad u Eelco Schattorie.
