Patna, Naitung:
U Myntri Rangbah jong ka Bihar u Nitish Kumar, ha ka Sngi Saitjaiñ, u la pynbna ban pynkiew ïa ka bai bam tymmen jong ki nongthoh khubor kiba la shongthait na ka skhim ‘Bihar Patrakar Samman’, da T.9,000 shibnai.
Mynta, baroh ki nongthoh khubor kiba la shongthait kiba dei hok, kiba la pynrung kyrteng ha ka Sorkar Bihar, kin ïoh T.15,000 shibnai ha ka jaka jong ka bainong kaba kham mynshwa kaba ki ju ïoh kaba long T.6,000 man u bnai.
Kane ka rai ka wan shwa ka jingthep vote ha ïing dorbar kaba la buh ban pynlong ha kaba kut jong une u snem.
Haba pynbna ïa kane ka rai, u Myntri Rangbah, ha ka jingthoh ha ka rynsan X ha ka sngi Saitjaiñ, u la thoh: “Nga sngewkmen ban pyntip ba hapoh ka skhim penshon ‘Bihar Patrakar Samman’, la ai jingbthah ban ai penshon T.15,000 shibnai ha ka jaka jong ka T.6,000 sha baroh ki nongthoh khubor kiba dei hok.”
Nalor kata, lada jia ba u nongthoh khubor u khlad noh uba ïoh bai bam tymmen hapoh katei ka skhim, la ai jingbthah ban ai ïa ka sha kiba ïoh jingkyrshan na u/ne ki kurim jong ki da ka bai bam kaba shi jingim kaba long T.10,000 shibnai ha ka jaka jong ka pisa kaba ha shwa kaba long T. 3,000, u la thoh.
“Ki nongthoh khubor ki don ka bynta kaba kongsan ha ka synshar paidbah. Ki dei u païa basaw jong ka synshar paidbah bad ki don ka bynta kaba kongsan ha ka roi ka par ha ka imlang-sahlang. Ngi la sumar bha ïa ki jaka jong ki nongthoh khubor naduh kaba sdang khnang ba kin lah ban pyndep ïa la ka kam khlem da ñiew shiliang bad ban im donburom hadien ba ki la shongthait,” la bynrap u Kumar.
