Jammu, Naitung:
U Chairman jong ka Democratic Progressive Azad Party (DPAP), u Ghulam Nabi Azad, u la khot la wer ïa ka saiñ pyrthei kaba ïatylli, na ka bynta ban pynïoh biang ïa ka jinglong jylla bapura jong ka Jammu & Kashmir.
U Azad u la pynpaw ruh ïa ka jingsngewkhia halor ka jinglong jingman jong ka roi ka par ha Jammu & Kashmir, da kaba ong ba katba ki projek pdeng ki dang ïaid shakhmat, ki jingthmu ha ka kyrdan jong ka jylla ki la “sahkut lut”.
“Wat u Myntri Rangbahduh bad u Myntri ka tnat ki kam pohïing ki la kular ban pynphai biang ïa ka (jinglong jylla) ha ka phyllaw jong ka Parliament. Katto katne ki jingbakla ki la ïai bteng ban jia namar kata ka la don ka jingpynslem. Nyngkong, dei ban buh ïa ka jingdawa (hakhmat ka sorkar), hynrei ki briew ki mih mardor sha surok,” la ong u Azad ha ki nongthoh khubor.
“Dei ban ïakren khia ïa kane ka kam, ym tang ban pynphai ïa ka jingpyrkhat jong ki paidbah,” u la ong.
Haba kren halor ki jingïakhih kiba dang ïaid shakhmat bad ki jingïakhih saiñ hima sima ban dawa ïa ka jinglong jylla, u Azad u la pynskhem ba watla baroh ki don ka hok ban ïakhih, hynrei ka jingïakren kaba don jingmut bad ki nongïalam pdeng ka la dei ban don shwa ïa kum kine ki kam.
“Ki jingïakhih ki long ar jait — kiba pyni ïa ka dak bad kiba don thong. Hynrei shwa ban hiar sha surok, ki nongïalam saiñ pyrthei ki la dei ban ïakynduh bad ka Delhi. Ngi donkam ïa ka jingïatylli, ym ïa ka jingïapait ïapra, halor kane ka mat,” u la ong.
U Azad u la ban jur ba ka jingdawa ban pynphai biang ïa ka jinglong jylla ka don ka jingïasngewthuh jingmut kaba jylliew ha kylleng ki jaitbynriew bad ki thaiñ.
“Ym don kano kano ka jingpyrshah ïa ka jingmut jong ka jinglong jylla — la ka long ha Jammu, Kashmir, ne hapdeng kino kino ki kynhun niam”, u la ong.
Halor ka jingkhot jong ka National Conference dang shen ban don ka dorbar kyrpang halor ka jinglong jylla, u Azad u la pdiang sngewbha ïa kane ka jingmut, da kaba ong ba ka Assembly ka dei ka rynsan kaba ïasam lang na ka bynta baroh ki seng bad ïa kane ka kam ym dei ban peit lyngba ka jingpeit shiliang khmat.
