Kolkata, Naitung:
Ka jingshah kynnoh jong ka Myntri Rangbah ka West Bengal, ka Mamata Banerjee, ba ki pulit jong ka Delhi, ki la pynshitom beiñ ïa uwei u khynnah rit bad ïa ka kmie jong u, ha ka 26 tarik, Naitung, ha ka por ba dang ïaid shakhmat jong ka jingïakhih pyrshah ïa ki nongbylla sngi na ka jylla jong ka, halor ka jingsuba ba ki dei ki nongwan buhai shnong be-aiñ na Bangladesh, ka la pynmih ïa ka jingïakynad ha ka Sngi Ba-ar, ha kaba ka seng Bharatiya Janata Party (BJP), ka la ujor sha ki pulit ha ka nongbah jong ka.
Ha ka shithi ujor, kaba la ïohi ïa ka kopi da kawei na ki lad phah khubor, ïa ka Banerjee la kynnoh halor ka “jingpynphriang ïa ki jingthoh bad kiba pynkhihwin ïa ka jaitbynriew ha ki Social media kiba thmu ban pynjah burom ïa ki pulit ka Delhi bad ban pynthut ïa ka shongsuk shongsaiñ.”
Ïa kane la mudui ha ka nohphai Sngi Ba-ar ha ka tnat Cyber Crime kaba don ha ophis pulit jong ka nongbah Delhi da u Soumendu Adhikari uba dei u dkhot jong ka BJP ha Lok Sabha na Contai bad u hynmen jong u nongïalam ka Liang pyrshah ha Bengal Assembly, u Suvendu Adhikari.
Ka shithi ujor ka la ong ba ka Banerjee ka dei ban shah pynngat ha ki katto-katne ki kam runar ba kynthup ïa “ka jingai jingpynkhihwin khlem da thmu ban pynmih jingkulmar” bad “ka jingthombor ha ka cyber.”
Ha ka 27 tarik, Naitung, ka Banerjee ka la pynmih ïa ka durkhih jong uwei u khynnah ba dang rit bad ka kmie jong u ha ki Social Media bad ka la kynnoh ba ki pulit jong ka nongbah Delhi ki la pynshitom beiñ ïa ki ha ka met jong ki ha ka por ba don ka jingpyntreikam.
“Kaba ishyrkhei!! kaba itriem!! Peit kumno ki pulit ka Delhi ki la shoh beiñ ïa u khynnah bad ka kmie jong u, ki dkhot jong ka longïing ki nongwan buhai shnong na Malda’s Chanchal. Peit kumno wat u khynnah ruh um lait na ka jingleh donbor ha ka jingsynshar jong ka jingpyntieng da ka ktien ba la pynmih da ka BJP ha ka ri pyrshah ïa ki Bengali jong ngi! Shano ki don?” Ka Banerjee ka la thoh ha ka rynsan X.
Ka la pynmih ïa kane ka durkhih katto katne kynta hadien ba ka Trinamool Congress (TMC) ka la sdang ïa ka “Bhasa Andolan” (ka jingïakhih ktien) kaba la neh shisnem da kaba kynnoh ba ki pulit ha ki jylla ba la synshar da ka BJP ki thmu kyrpang ïa ki nongbylla sngi kiba kren da ka ktien Bengali.
Ka Banerjee ka la kdew biang ïa katei ka durkhih ha ka lah sngi U Blei, katba ka dang ïalam ïa ka jingïakhih ha Birbhum distrik.
La ïohi ba ïa katei ka durkhi la ringdur da uwei u briew uba la kdew ïa ki katto katne ki dak ha ka shkor bad ka shyllang mat jong u khynnah.
“Ki pulit ki la pynshitom beiñ ïa ka kurim jong nga bad ïa u khun shynrang uba dang shisnem shiteng,” lah ban ïohsngew ïa une u briew ba u ong ha ka durkhih. Ki pulit ka Delhi ki la pyrshah ïa kane ka jingkynnoh ha ka lah sngi U Blei, da kaba khot ïa kane ka jingkynnoh “ba la shna thok” bad “ba la pynlong da ka saiñ pyrthei.”
Haba kren sha ki lad pathai khubor, u Deputy Commissioner of police (East) u Abhishek Dhania u la ong, “hadien ba la wad jingtip, ngi la ithuh ïa katei ka longkmie ba ka dei ka Sanjanu Parveen, ha ka jingtohkit, ka la kynnoh ba ha ka miet jong ka 26 tarik, Naitung, saw ngut ki briew kiba phong da ki riam paidbah kiba leh mynleh kum ki pulit ki lia ïalam ïa ka bad ïa u khun jong ka sha kawei ka jaka bad dawa T. 25,000, ha kaba ka la kam ba ka la siew.”
U DCP u la ong ba ka jingtohkit jong ki pulit, ka jingbishar bniah ïa ki dur na ki Camera jong ka thaiñ bad ki jingwad bniah jong ka thaiñ ki la pynpaw ïa ki jingbym ïahap ha ki jingkren jong ka kynthei.
“Ha ka jingtohkit kaba bteng, katei ka longkmie ka la kam ba u bahaïing hasem jong ka, uba trei na ka bynta ki kam saiñ hima sima na Malda distrik ha West Bengal, u la bthah ïa ka ban shna ïa kane ka durkhih, hadien kata la pynsaphriang ïa ka ha ka thaiñ Bengal bad hadien ka la paw ha ki Social media,” ong u Dhania.
