Khliehriat, Naitung 29
Ka Dkhiah West SCSO, Diengshalalu SC bad Umlyngsha Youth SC ki la ïoh jingjop ha ka lympung ïalehkai 2nd Division Football League 2025 ba la pynïaid da ka East Jaiñtia Hills District Football Association (EJHDFA) ha ka Sngi Ba-ar ha madan artificial turf Diengshynrum, Khliehriat.
Ha ka jingïalehkai kaba nyngkong, ka Dkhiah West SCSO ka la pynliem ïa ka Tpep Swer SSWO da 1-0 kol bad ïa kane kol la thep da u Reaching Talang ha ka minit kaba 35.
Ha ka jingïalehkai kaba bud, ka Diengshalalu SC ka la pynliem ïa ka Ryntihlang SC Brishyrnot da 3-0 kol. U Khmihbha Rymbai u la thep ar kol ha ka minit kaba 21 & 53 bad Shemphang Ksih ha ka minit ba 32.
Haba phai sha kawei pat ka jingïakhun kaba khatduh, ka Umlyngsha Youth SC ka la jop da 2-0 kol ïa ka Wapung Skur SSWO. Ïa kine kol la thep da u Ajoy Talang ha ka minit kaba 36 bad u Kamni Rupsi (54).
