Hyderabad, Naitung:
U Chairman jong kawei ka Cooperative Society lem bad u khun ki la shah kem ha ka kynhun Telangana Crime Investigation Department (CID) halor ka jingthok pisa kaba la kot sha ka T. 140 klur, kaba la leh da kaba pynshong nongrim ban pyntrei na ka bynta ka skhim Pradhan Mantri Mudra Yojana (PMMY) kaba heh bha jong ka sorkar pdeng.
U Tippaneni Ramadasappa Naidu, (61) uba dei Chairman jong ka Mudra Agriculture Skill Development Multi-State Cooperative Society Limited bad u khun Sai Kiran, (43), uba dei u dkhot ba kongsan jong katei ka kompeni, ki la shah set patok hynnin ka sngi. La kynnoh ba kine arngut shikpa-shikhun ki la thok ïa 2,000 ngut ki briew lyngba kane ka jingleh thok.
U Naidu u la seng ïa ka Cooperative Society ha u snem 2017, da kaba thmu ban pyndonkam bakla ïa ka jingpynrung kyrteng jong ka PMMY ban thok ïa ki paidbah ba ka dei ka kynhun kaba la kyrshan da ka sorkar, la pynpaw ka jingtohkit jong ka kynhun CID. Lyngba ki jingpynbna ba bniah ha ki kot khubor jong ki thaiñ, da ki hajar ngut ki briew, kynthup ïa ki nongrep, ki samla bym don kam don jam, bad ki nongtrei bylla sngi, ki la ngop ha kine ki jingshah pynbiej da ki jingkular lamler ba kin ïoh jingmyntoi na ki jingbei tyngka bad ki kam sorkar ba la pynthikna ba kin ïoh.
