New Delhi, Naitung:
Ka seng Bharatiya Janata Party (BJP) ka thmu ban sdang ïa ka Tiranga Yatra (Tricolour March) ha baroh kawei ka ri ha kylleng ki Mandal naduh ka 10 haduh ka 14 tarik u Nailar. Kane ka jingïalap paidbah ka don jingthmu ban pynsaphriang ïa ka jingshaniah bad ban pynpaw ïa ka jingjop jong ka Operation Sindoor, la ïathuh ka tyllong khubor.
Ha kane ka yatra, ki jingkren ba la ai ha Parliament da u Myntri Rangbahduh ka ri u Narendra Modi, u Myntri ka tnat ki kam pohïing jong ka sorkar pdeng u Amit Shah, u Myntri ka tnat ïada ri u Rajnath Singh bad kiwei kiwei ki heh nongïalam ha ka jingïatai ba kyrpang halor ka Operation Sindoor yn sa pynphriang bha ha ki paidbah.
Kum shi bynta jong ka jingïalap paidbah jong ka Har Ghar Tiranga, yn pynher ïa ka lama ka ri ha man la ki ïing bad ki jaka treikam naduh ka 13 haduh ka 15 tarik u Nailar.
Hashwa kane, ka BJP ka la pynlong ïa ka Tiranga Yatra kaba 10 sngi naduh ka 13tarik Jymmang haduh ka 23 tarik, Jymmang ban rakhe ïa ka jingjop jong ka Operation Sindoor. Ka jingthmu kam shym la long tang ban pyntip sha ki paidbah shaphang ki jingjop jong ka jingtreikam hynrei ban pynmih ruh ïa ka mynsiem jong ka jingsarong bad jingïatylli jong ka ri.
Kane ka bynta ba thymmai jong ka jingïalap paidbah ka long hadien ka jingïakren kaba 16 kynta ha Lok Sabha halor ka Operation Sindoor, kaba pynskhem ïa ka jingkordor jong ka ha ka ri.
Yn pynlong ïa ka Swachhata Abhiyan (jingpynkhuid) ha ki jaka ba ïadei bad ka jingïakhun laitluid, ki jaka sah kynmaw ha ka thma, bad ki jaka ba pawnam jong ka ri.
“Ki placard kiba ïaroh ïa ki shipai ïada jong ka ri India, kiba kynmaw burom ïa ki martir, bad kiba pyni ïa ki tiar ïada tynrai yn pyni pawnam ha baroh kawei ka yatra. Kum shi bynta jong ki jingïalang, yn pynkup burom ïa ki heh pulit, ki riewshlur ha ka thma, bad ki bahaïing hasem jong ki shipai kiba la ïap, la pynlong–hapoh ki jingbit jong ki bor sorkar–ha kaba yn ai khublei kyrpang ïa ki shipai kiba shakri na ka bynta
Ha ka 14 tarik u Nailar, kan sa don ka jingïaid paidbah kaba jar jar ha kylleng ka ri ban rakhe ïa ka Vibhajan Vibhishika Smriti Diwas (Partition Horrors Remembrance Day), ban ai burom ïa kito kiba la shah shitom ha ka por jong ka jingïaleh bad ki jingïapher.
Man kawei pa kawei ka jylla kan thaw ïa ka komiti kaba kynthup ïa uwei u nongpynïaid bad lai ngut ki dkhot ban pynïaid ïa ka yatra. Ha ka kyrdan jong ka ri, la thung ïa u National General Secretary ka BJP u Sunil Bansal kum u Chief Coordinator na ka bynta kane ka jingïalap paidbah.
Kumba la khmih lynti la ong ba ka Tiranga Yatra kan long ka jingïatylli kaba rakhe ïa ki jingjop jong ka India ha ka kam shipai, kaba burom ïa ki riewshlur jong ka, bad kaba pynroi ïa ka mynsiem ba thymmai jong ka jinglong trai ri. Ha ka yatra kaba la long ha u bnai Jymmang, ki jingpyrta kum “Bharat Mata Ki Jai,” “Hindustan Zindabad,” bad “Indian Army Zindabad” ki la sawa ha kylleng ki jaka, ha kaba da ki Million ngut ki la ïashim bynta ha kaei kaba ka seng ka la batai kum ka dak jong ka jingïatylli jong ka India pyrshah ïa ki kam lehnoh.
